Vinayaka Chavithi 2020: సందడి కరువైన వినాయక చవితి.. కొన్నిచోట్ల ఫేస్ బుక్, జూమ్ యాప్ ద్వారా దర్శనాలు

Vinayaka Chavithi 2020: సందడి కరువైన వినాయక చవితి.. కొన్నిచోట్ల ఫేస్ బుక్, జూమ్ యాప్ ద్వారా దర్శనాలు
x
Highlights

Vinayaka Chavithi 2020: వినాయక చవితి వస్తుందంటే చాలు... అందరికీ ఎక్కడా లేని హడావిడి ఉండేది.

Vinayaka Chavithi 2020: వినాయక చవితి వస్తుందంటే చాలు... అందరికీ ఎక్కడా లేని హడావిడి ఉండేది... ప్రతిమలు చేసినదగ్గర్నుంచి వాటిని తరలించడం, మండపాలు సిద్ధం చేయడం, మైక్ ల హోరు, పూజారుల బిజీ, నవ రాత్రుల్లో నిర్వహించే ప్రత్యేక కార్యక్రమాల ఆర్టిస్టులు ఇలా ఒకటేమిటి అంతా హడావిడే ఉండేది. అయితే ప్రస్తుతం ఆ హడావిడి కనిపించలేదు. కరోనా నేపథ్యంలో కొన్ని రాష్ట్రాలు ఇంటికే పరిమితం చేయాలని, మరికొన్ని రాష్ట్రాలు కేవలం ఐదుగురికే పర్మిషన్ అని ఇలా ఒకోచోట ఒకోరకంగా అనుమతులు వచ్చారు. అయితే ఢిల్లీలో పూర్వం నుంచి ఈ ఉత్సవాలను నిర్వహిస్తున్న కమిటీ జూమ్ యాప్, ఫేస్ బుక్ ద్వారా దర్శనాలకు అవకాశం కల్పిస్తూ ఏర్పాట్లు చేసుకుంటున్నాయి.

వినాయక చవితి పండుగంటే పిల్లా పెద్దల్లో ఒకటే సంబరం. గణపతి బప్పా మోరియా అంటూ వీధులన్నీ మారుమోగిపోతాయి. పెద్ద పెద్ద విగ్రహాలు, వైవిధ్యమైన రూపాలతో గణపతి రూపులు ఆకట్టుకుంటాయి. కానీ ఈసారి కరోనా వైరస్‌తో భౌతికదూరం పాటించాల్సి రావడంతో ఎక్కడా పండుగ వాతావరణమే కనిపించడం లేదు.

అంబరాన్నంటే సంబరాలు లేకపోయినా విఘ్నాల దేవుడు కరోనా నుంచి కాపాడాలంటూ దేశవ్యాప్తంగా ప్రజలు పూజలకి సిద్ధమవుతున్నారు. ఆంక్షల మధ్య గణపయ్యలను సిద్ధం చేస్తూ శనివారం నాడు తమ శక్తి కొద్దీ పండుగ చేయడానికి ఏర్పాట్లు చేశారు. గణేశ్‌ ఉత్సవాల్ని ఘనంగా నిర్వహించే మహారాష్ట్రలో ఈసారి ఒకేసారి అయిదుగురు భక్తులకు మించి అనుమతించకూడదని ఆంక్షలు విధించారు.

అంతేకాదు నాలుగు అడుగులకి మించి విగ్రహం పెట్టడానికి అనుమతి నిరాకరించారు. చాలా చోట్ల 10 రోజులకు బదులుగా ఒకటిన్నర రోజులో గణేశ్‌ నిమజ్జనానికి ఏర్పాట్లు చేసుకుంటున్నారు. ఇక కరోనా వైరస్‌ని చంపేస్తున్న పోజులో గణపతులు కొలువుతీరుతున్నారు. గుజరాత్‌లోని అహ్మదాబాద్‌లో వినాయకుడికి మాస్కులు కూడా తొడుగుతున్నారు. బెంగళూరులో వార్డుకి ఒక్క గణేశుడికి మాత్రమే అనుమతిచ్చారు.

మండపాల దగ్గర ప్లాస్మా కేంద్రాలు

ముంబైలో ప్రతీ ఏడాది 3 వేల వరకు గణేశ్‌ మండపాలు పెట్టేవారు. ఈ ఏడాది వాటి సంఖ్య 1,800కి తగ్గిపోయింది. నగరంలో సుప్రసిద్ధ లాల్‌బాగ్‌చా మండపం సమీపంలో కరోనా రోగులకు ప్లాస్మా దానం కోసం శిబిరాన్ని ఏర్పాటు చేశారు. ముంబై నగర బీజేపీ శాఖ వినాయక నిమజ్జనం కోసం ప్రత్యేకంగా రథాన్ని ఏర్పాటు చేసింది. ఆ రథంలో నీళ్ల ట్యాంకులు ఏర్పాటు చేసి ఇంటింటికీ వెళ్లి గణేశుల్ని అందులో నిమజ్జనం చేసేలా చర్యలు చేపట్టింది.

ఢిల్లీలో జూమ్‌ కాల్‌ దర్శనాలు

ఢిల్లీలోని అత్యంత పురాతన గణేశ్‌ ఉత్సవ కమిటీ మరాఠి మిత్ర మండల్‌ ఫేస్‌బుక్, జూమ్‌ యాప్‌ల ద్వారా దర్శనాలకి ఏర్పాట్లు చేసింది. భక్తులు ఇంటి నుంచి దర్శించుకొని హారతి కూడా తీసుకునే సదుపా యాలు ఏర్పాటు చేసింది. ''కరోనా సమయంలో గణపతి ఉత్సవాలను నిర్వహించడం అత్యంత కష్టం. అందుకే ఒకటిన్నర రోజులకే పరిమితం చేశాం. 35 ఏళ్ల తర్వాత ఈ ఉత్సవాల్ని సాదాసీదాగా నిర్వహిస్తున్నాం''అని ఉత్సవ కమిటీ సభ్యురాలు నివేదిత చెప్పారు.

Show Full Article
Print Article
Next Story
More Stories