Hathras Stampede: హాథ్రస్ ఘటన వెనక అసాంఘిక శక్తులు..భోలే బాబా ఏమన్నారో తెలుసా?

Hathras Stampede:యూపీలోని హాథ్రస్ తొక్కిసలాటలో 121 మంది ప్రాణాలు కోల్పోయారు. ఈ ఘటన యావత్ దేశంతోపాటు ప్రపంచాన్ని తీవ్ర దిగ్భ్రాంతికి గురి చేసింది. ఈ దుర్ఘటన జరిగిన ఒక రోజు తర్వాత భోలే బాబా స్పందించాడు. తాను ఆ వేదిక నుంచి వెళ్లిపోయిన చాలా సమయం తర్వాత ఈ తొక్కిసలాట జరిగిందని చెప్పుకొచ్చాడు. అంతేకాదు ఈ దుర్ఘటన వెనక అసాంఘిక శక్తులు ఉన్నాయని ఆరోపణలు చేస్తూ ఓ ప్రకటనను కూడా విడుదల చేశాడు.

ఈ ఘటనలో ప్రాణాలు కోల్పోయిన వారి కుటుంబాలకు నా ప్రగాఢ సానుభూతి తెలియజేస్తున్నా. గాయపడినవారు తొందరగా కోలుకోవాలని ఆ భగవంతుడిని ప్రార్థిస్తున్నాను అని పేర్కొంటూ నారాయణ్ సాకార్ హరి భోలే బాబా అన్నారు. తాను వేదిక నుంచి వెళ్లిపోయిన చాలా సమయం తర్వాతే ఈ ఘటన జరిగిందని చెబుతున్నాడు. భక్తులను అతని సెక్యూరిటీ సిబ్బంది తోసివేయడం వల్లే ఈ ప్రమాదం జరిగిందని ప్రాథమిక దర్యాప్తులో తేలింది. ప్రమాదం జరిగిన సమయంలో బాబా వేదిక దగ్గరే ఉన్నట్లు పేర్కొంది.

దాదాపు రెండున్నర లక్షల మంది ఈ సత్సంగ్ కు హాజరయ్యారు. మధ్యాహ్నం 12:30కి బాబా వేదిక వద్దకు వచ్చారు. దాదాపు గంటపాటు ఈ కార్యక్రమం జరిగింది. 1.40గంటల ప్రాంతంలో భోలే బాబా బయటకు వచ్చాడు. వేదిక నుంచి వెళ్లే క్రమంలో దర్శనం కోసం భక్తులు ఆయన వెంట పరుగెత్తడం..ఆయన పాదల వద్ద మట్టిని తీసుకునే ప్రయత్నం చేశారు. ఈ క్రమంలో తొక్కిసలాట జరిగిందని దర్యాప్తులో పేర్కొన్నారు అధికారులు.

పోస్టు మార్టమ్ రిపోర్టు:

హథ్రాస్ తొక్కిసలాటలో 121 మంది మరణించిన తరువాత, 21 మృతదేహాలను ఆగ్రాలోని ఎస్ఎన్ మెడికల్ కాలేజీ, ఆసుపత్రికి తీసుకువచ్చారు. తొక్కిసలాటలో మరణించిన వారి మరణానికి ప్రధాన కారణం ఛాతీ గాయాలు, ఊపిరాడక, పక్కటెముకల గాయాల కారణంగా ఛాతీ కుహరంలో రక్తం గడ్డకట్టడం వల్ల మరణించినట్లు ఆగ్రాలోని ప్రభుత్వ ఆసుపత్రిలో నిర్వహించిన పోస్ట్ మార్టం వెల్లడించింది.ఛాతీ కుహరంలో రక్తం చేరడం, ఊపిరాడక, పక్కటెముకలకు గాయాలు కావడం వల్లే ఎక్కువ మంది చనిపోయారని ఎస్‌ఎన్ మెడికల్ కాలేజీ అండ్ హాస్పిటల్ చీఫ్ మెడికల్ ఆఫీసర్ అరుణ్ శ్రీవాస్తవ తెలిపారు. ఆగ్రా ఆధారిత కేంద్రానికి తీసుకువచ్చిన మృతుల్లో మధుర, ఆగ్రా, పిలిభిత్, కస్గంజ్, అలీఘర్ నివాసితులు ఉన్నారు.

భోలే బాబా నిర్వహించిన 'సత్సంగం' వినడానికి హత్రాస్ జిల్లాలోని సికంద్రా రౌ ప్రాంతంలోని రతీ భాన్‌పూర్ గ్రామంలో వేలాది మంది ప్రజలు భారీ ఎత్తున తరలివచ్చారు. మంగళవారం తొక్కిసలాట జరిగింది. భోలే బాబా అలియాస్ నారాయణ్ సకర్ హరి అలియాస్ సూరజ్‌పాల్ జాతవ్ మతపరమైన కార్యక్రమం ముగిసిన తర్వాత మహిళలు వేదిక నుండి బయటకు వచ్చిన వెంటనే తొక్కిసలాట జరిగినట్లు అధికారులు తెలిపారు. కాగా ఈ ఘటనపై 'సత్సంగ్' నిర్వాహకులపై పోలీసులు ఎఫ్ఐఆర్ కూడా నమోదు చేశారు.