Vishwak Sen: చేతులు మారిన కథ.. శర్వానంద్‌ అనుకుంటే..?

Vishwak Sen: ఈ మధ్యనే ఓరి దేవుడా సినిమాతో ప్రేక్షకుల ముందుకు వచ్చిన యువ హీరో విశ్వక్ సేన్ తాజాగా ఇప్పుడు తన తదుపరి సినిమా "దాస్ కా ధమ్ కీ" సినిమాతో బిజీగా ఉన్నారు. స్వీయ దర్శకత్వంలోనే విశ్వక్ సేన్ ఈ సినిమాలో నటిస్తున్నాడు. ఇప్పటికే ఈ సినిమా షూటింగ్ మొత్తం పూర్తయింది. త్వరలోనే ఈ సినిమా తన కెరియర్ లోనే మొట్టమొదటి ప్యాన్ ఇండియా సినిమాగా విడుదల కి సిద్ధమవుతోంది. తెలుగులో మాత్రమే కాక ఈ సినిమా ఇంకో నాలుగు భాషల్లో కూడా థియేటర్లలో సందడి చేయనుంది.

భారీ అంచనాల మధ్య ఈ సినిమా ఫిబ్రవరి 17న థియేటర్లలో విడుదల కాబోతోంది. నివేదా పెతురాజ్ ఈ సినిమాలో హీరోయిన్ గా నటించింది. ఇప్పటికే ఈ సినిమా ప్రమోషన్స్ ను మొదలు పెట్టేసింది చిత్ర బృందం. ఇదిలా ఉండగా విశ్వక్ సేన్ సితార ఎంటర్టైన్మెంట్స్ పతాకంపై మరొక సినిమాకి గ్రీన్ సిగ్నల్ ఇచ్చారు. "రౌడీ ఫెలో" అనే టైటిల్ తో ఈ సినిమా ప్రేక్షకుల ముందుకు రానుంది. ఈ సినిమాకి కృష్ణ చైతన్య దర్శకత్వం వహిస్తున్నారు. ఈ మధ్యనే నితిన్ హీరోగా "చల్ మోహన్ రంగా" సినిమాకి దర్శకత్వం వహించిన కృష్ణ చైతన్య ఇప్పుడు విశ్వక్ సేన్ తో ఈ సినిమాని రూపొందిస్తున్నారు.

ఈ సినిమా రెగ్యులర్ షూటింగ్ ఏప్రిల్ నుంచి పట్టాలెక్కబోతున్నట్లు తెలుస్తోంది. ఈ సినిమా గురించిన అధికారిక ప్రకటన మరియు మరిన్ని వివరాలు త్వరలో తెలియనున్నాయి. నిజానికి కృష్ణ చైతన్య శర్వానంద్ హీరోగా కూడా ఒక సినిమా చేయాల్సి ఉంది కానీ శర్వానంద్ పెళ్లి పనులు బిజీగా ఉండడం వల్ల ఈ సినిమా ఆలస్యం అవుతూ వచ్చింది. ఈ లోపు కృష్ణ చైతన్య విశ్వక్ సేన్ తో సినిమాని మొదలు పెట్టడానికి రెడీ అయ్యారు. అయితే శర్వానంద్ తో అనుకున్న సినిమాని విశ్వక్ సేన్ తో తీస్తున్నారా లేక ఇది వేరే సినిమానా అని ఇంకా తెలియాల్సి ఉంది.