"ఆర్ఆర్ఆర్" ఈవెంట్ కి రానున్న హాలీవుడ్ స్టార్

RRR: మెగా పవర్ స్టార్ రామ్ చరణ్ మరియు యంగ్ టైగర్ ఎన్టీఆర్ హీరోలుగా త్వరలో ప్రేక్షకుల ముందుకు రాబోతున్న భారీ బడ్జెట్ ప్యాన్ ఇండియన్ మల్టీస్టారర్ సినిమా "ఆర్ఆర్ఆర్". ఎస్ ఎస్ రాజమౌళి దర్శకత్వం వహిస్తున్న ఈ సినిమా ఈ ఏడాది సంక్రాంతి సందర్భంగా జనవరి 7న విడుదల కావాల్సింది కానీ ఇప్పుడు ఈ చిత్రాన్ని మార్చ్ 25 కి వాయిదా వేశారు దర్శకనిర్మాతలు. ప్రస్తుతం నిర్మాణానంతర పనులతో బిజీగా ఉన్న మూవీ యూనిట్ త్వరలోనే ప్రమోషన్స్ ని మొదలు పెట్టబోతున్నారు. ఈ నేపథ్యంలోనే సినిమా ప్రీ రిలీజ్ ఈవెంట్ ని భారీస్థాయిలో ప్లాన్ చేస్తున్నారట.

తాజాగా ఈ చిత్రం ప్రీ రిలీజ్ ఈవెంట్ కి సంబంధించిన ఓ ఆసక్తికరమైన వార్త ఇప్పుడు సోషల్ మీడియాలో వైరల్ గా మారింది. "ఆర్ఆర్ఆర్" ప్రీ రిలీజ్ ఈవెంట్ ఇక్కడ కాదు దుబాయ్ లో జరగబోతోంది. ఈ ఈవెంట్ కి ప్రముఖ హాలీవుడ్ యాక్టర్ టామ్ క్రూజ్ ముఖ్యఅతిథిగా విచ్చేస్తున్నట్లుగా వార్తలు వినిపిస్తున్నాయి. ఇప్పటికే ఈ సినిమాలో ఒలీవియా మోరిస్, రే స్టీవెన్సన్ వంటి హాలీవుడ్ నటులు కీలక పాత్రలు పోషిస్తున్న సంగతి తెలిసిందే. ఇప్పుడు ప్రీ రిలీజ్ ఈవెంట్ కి టామ్ క్రూజ్ ను పిలిచి సినిమాకి మరింత హైప్ ను పెంచబోతున్నరు దర్శక నిర్మాతలు.