బిగ్ బాస్ సెట్స్ లో 'సైరా' షూటింగ్

టాలీవుడ్ మెగాస్టార్ చిరంజీవి నటిస్తున్న 'సైరా నరసింహ రెడ్డి' సినిమా పైన భారీ అంచనాలున్న సంగతి తెలిసిందే. ఉయ్యాలవాడ నరసింహ రెడ్డి జీవిత చరిత్ర ఆధారంగా సురేందర్ రెడ్డి దర్శకత్వంలో తెరకెక్కనున్న ఈ సినిమాను రామ్ చరణ్ కొణిదెల ప్రొడక్షన్స్ పతాకంపై భారీ బడ్జెట్ తో నిర్మిస్తున్నారు. తాజా సమాచారం ప్రకారం ఈ సినిమాలో 90 శాతం టాకీ పార్ట్ షూటింగ్ పూర్తయినట్లు తెలుస్తోంది. త్వరలో అన్నపూర్ణ స్టూడియోస్ లో ఒక కీలకమైన షూటింగ్ షెడ్యూల్ మొదలు కానుంది. కోకాపేటలో చిరు ఫామ్ హౌస్ లో వేసిన సైరా సెట్ మంటల్లో కాలిపోయిన సంగతి తెలిసిందే.

ఈ నేపథ్యంలో షూటింగ్ ను ఆలస్యం చేయకుండా 'సైరా' ప్రొడక్షన్ డిజైన్ టీం 7 ఎకరాల్లో సినిమా కోసం భారీ సెట్ డిజైన్ చేస్తున్నట్లుగా తెలుస్తోంది. అంతేకాకుండా బిగ్ బాస్ సెట్స్ పై కూడా 'సైరా' సినిమా లోని ఒక పాట షూటింగ్ జరగబోతోందని తెలుస్తోంది. నిర్మాత రామ్ చరణ్ కేవలం ఈ ఒక్క పాట కోసం రెండు కోట్ల రూపాయలను వెచ్చిస్తున్నట్లు సమాచారం. అమితాబచ్చన్, నయనతార, విజయ్ సేతుపతి, సుదీప్ జగపతిబాబు తమన్నా తదితరులు ముఖ్య పాత్రలు పోషిస్తున్న ఈ సినిమా ఈ ఏడాది దసరా సందర్భంగా విడుదల కానుంది.