సుడిగాలి సుధీర్‌కి షాక్‌.. సినిమా షూటింగ్‌ అడ్డుకున్న జనం

బల్లితెర‌పై త‌న మార్క్ కామెడీతో , డాన్స్ , మ్యాజిక్ తో ఎంతో మందిని అభిమానుల‌ను సంపాదించుకున్న సుడిగాలి సుధీర్‌కి జనం నుంచి ఊహించ‌ని షాక్ త‌గిలింది. హైద‌రాబాద్ లోని మ‌ల‌క్‌పేట పోలీస్‌స్టేష‌న్ ప‌రిధిలో బీ బ్లాక్ కాల‌నీలో ఈ ఘ‌ట‌న చోటు చేసుకుంది. వివరాల్లోకి వెళ్తే.. మ‌ల‌క్‌పేట పోలీస్ స్టేష‌న్ ప‌రిధిలో సుధీర్ తన మూవీ షూటింగ్‌లో పాల్గొన్నారు. స్థానికులు షూటింగ్ ప్రదేశానికి చేరుకుని దానిని అడ్డుకున్నారు. క‌రోనా ఉద్ధృతి నేపధ్యంలో నివాసాల మ‌ధ్య షూటింగ్‌లు నిర్వ‌హించ‌డంపై స్థానికులు ఆగ్ర‌హం వ్య‌క్తం చేశారు. సమాచారం అందుకున్న పోలీసులు అక్కడికి చేరుకొని స్థానికులకు నచ్చజెప్పే ప్రయత్నం చేశారు. సినిమా షూటింగ్ చేసేందుకు ప‌ర్మిష‌న్ ఉంద‌ని పోలీసులు వారికి వివరించారు. దీంతో పరిస్థితి కాస్త స‌ద్దుమ‌ణిగిన‌ట్లు స‌మాచారం.

జబర్దస్త్, ఢీ కార్య‌క్ర‌మాల్లో క‌మెడియ‌న్‌గా సుడిగాలి సుధీర్‌కు మంచి గుర్తింపు ఉంది. ప్ర‌స్తుతం సుధీర్ హీరోగా స‌రికొత్త అవ‌తారంలో ప్రేక్ష‌కుల‌కు మ‌రింత ద‌గ్గ‌ర కానున్నారు. అరుణ్ విక్కిరాల దర్శకత్వంలో సుధీర్‌ హీరోగా నటిస్తున్నారు. హార‌ర్ అండ్ థ్రిల్ల‌ర్ క‌థాంశంతో తెర‌కెక్కుతోన్న ఈ సినిమా షూటింగ్ శరవేగంగా జ‌రుపుకుంటోంది. కాలింగ్ స‌హ‌స్త్ర అనే మూవీలో న‌టిస్తున్నారు. అజ‌య్ శ్రీవాస్త‌వ అనే పాత్ర‌లో సుధీర్ క‌నిపించ‌నున్నాడు. ఇందుకోసం సుధీర్ చాలా వ‌ర్కౌట్లు చేశాడు. ఇందుకోసం సుధీర్ తన లుక్ కూడా మార్చారు.