Chiranjeevi : ఆచార్య తర్వాత చిరు చేయబోయే సినిమా ఏది?

Chiranjeevi : గత ఏడాది సైరా చిత్రంతో ప్రేక్షకులను ఆకట్టుకున్నారు మెగాస్టార్ చిరంజీవి.. ప్రస్తుతం చిరు కొరటాల శివ దర్శకత్వంలో 'ఆచార్య' అనే చిత్రం చేస్తున్నారు.. ఇది చిరంజీవికి 152వ చిత్రం కావడం విశేషం.. ఈ సినిమాని మ్యాట్నీ ఎంటర్టైన్మెంట్, కొణిదెల ప్రొడక్షన్ కలిసి సంయుక్తంగా నిర్మిస్తున్నాయి. కాజల్ కథానాయకగా నటిస్తోంది. ప్రస్తుతం కరోనా వైరస్ ప్రభావం వలన సినిమా వాయిదా పడింది.

అయితే ఈ సినిమా తరవాత చిరు చేయబోయే సినిమా పైన ఎక్కడ లేని ఆసక్తి నెలకొంది. లాక్ డౌన్ సమయంలో ఆచార్య తరవాత చేయబోయే చిత్రాలకి సంబంధించిన కథలను వింటున్నట్టుగా చిరంజీవి ఓ ఇంటర్వ్యూలో వెల్లడించిన సంగతి తెలిసిందే.. అందులో భాగంగానే మలయాళంలో భారీ హిట్ అయిన లూసిఫర్‌ రీమేక్ లో నటిస్తున్నట్టుగా చిరు స్పష్టం చేశారు. ఈ సినిమాకి సాహో ఫేం సుజీత్ దర్శకత్వం వహించనున్నాడని టాక్ వినిపించింది. అయితే సుజీత్ చేసిన మార్పులకి అంతగా ఇంప్రెస్ కానీ చిరు ఆ భాధ్యతలను వివి వినాయక్ చేతిలో పెట్టినట్టుగా సమాచారం..

ఇక ఇది ఇలా ఉంటే తమిళంలో హిట్ అయిన 'వేదాళం' సినిమాని కూడా చిరు రీమేక్ చేస్తున్నారు. ముందుగా ఈ సినిమాని పవన్ కళ్యాణ్ చేయాలనీ అనుకున్నారు. ప్రస్తుతం పవన్ వేరే సినిమాలతో బిజీగా ఉన్నారు. దీనితో వేదాళం సినిమాని చిరు చేయడానికి ఇంట్రెస్ట్ చూపించారు. ఈ రీమేక్‌ బాధ్యతలను దర్శకుడు మెహర్‌ రమేశ్‌ కి అప్పగించినట్టుగా సమాచారం.. అంతేకాకుండా త్రివిక్రమ్ సినిమా కూడా లైన్లో లోకి వచ్చినట్టు తెలుస్తుంది. దీనిలో ఏది ముందు పట్టాలెక్కనుందో తెలియాలంటే మరికొన్ని రోజులు ఆగాల్సిందే..