Junior Movie Review: డ్యాన్స్‌తో దుమ్ము రేపిన కిరీటి..ఇంతకీ సినిమా ఎలా ఉందంటే..

Junior Movie Review: కిరీటి రెడ్డి.. ఈ పేరు ఇప్పటి వరకు పెద్దగా ఎవరికీ పరిచయం లేదు. గాలి జనార్దన్ రెడ్డి కొడుకు సినిమాల్లోకి వస్తున్నాడని మాత్రమే అందరికీ తెలుసు. కానీ ఎప్పుడైతే వైరల్ వయ్యారి సాంగ్ ప్రోమో విడుదలైందో.. శ్రీలీల పక్కన ఎవడ్రా ఆ కుర్రాడు.. తనను మించి డ్యాన్స్ చేస్తున్నాడనే టాక్ చాలా స్ట్రాంగ్ గా వినిపించింది. ఒకసారి మహేష్ బాబు స్టేజ్‌పై మాట్లాడుతూ శ్రీలీలతో డ్యాన్స్.. వామ్మో! హీరోల తాట ఊడిపోద్ది అంటూ చేసిన కామెంట్ గుర్తుందా? కానీ వైరల్ వయ్యారి పాట వచ్చినప్పుడు శ్రీలీలతో సమానంగా కిరీటి డ్యాన్స్ ప్రేక్షకులకు బాగా కనెక్ట్ అయింది. మరి ఈ ఒక్క పాటతోనే సరిపెట్టారా? లేక 'జూనియర్' సినిమాతో గాలి వారసుడు ఇండస్ట్రీలోకి గ్రాండ్ ఎంట్రీ ఇచ్చాడా? అలానే జెనీలియాకి (Genelia) ఈ సినిమా టాలీవుడ్‌లో స్ట్రాంగ్ రీఎంట్రీ అయిందా తెలుసుకోవాలంటే సినిమా ఎలా ఉందో చూద్దాం.

కథలోకి వెళ్తే..

సినిమా ఓపెన్ కాగానే విజయనగరం అనే ఊరు కనిపిస్తుంది. ఆ ఊరిలో కోదండపాణి(వీ రవిచంద్రన్) శ్యామల దంపతులు లేటు వయసులో ఓ కొడుకుకు జన్మనిస్తారు. లేటు వయసులో తాము తల్లిదండ్రులు కాబోతుండడంతో ఆ పల్లెటూరి జనాలు ఈ వయసులో పిల్లలేంటి అని వెటకారం చేస్తుంటారు. ఆ మాటలు తట్టుకోలేక పుట్టి పెరిగిన ఊరు వదిలేసి వేరే ఎక్కడికైనా వెళ్లిపోవాలని నిండు గర్భిణిగా ఉన్న తన భార్యను తీసుకొని కోదండపాణి బస్సు ఎక్కుతాడు. అయితే అనుకోకుండా అదే బస్సులో శ్యామల ప్రసవించి బిడ్డను కోదండపాణి చేతిలో పెట్టి చనిపోతుంది.

ఆ రోజు నుంచి తన కొడుకు అభి(కిరీటి రెడ్డి)కి తల్లి తండ్రీ తానై పెంచుతాడు కోదండపాణి. అయితే తండ్రికి, తనకి మధ్య ఏజ్ గ్యాప్ ఎక్కువగా ఉండడంతో.. ఆయన చూపించే ప్రేమను అభి భారంగా భావిస్తుంటాడు. చెప్పిందే చెప్పడం, ప్రతి పని దగ్గరుండి బొమ్మరిల్లు ఫాదర్లా చేయించడం చూసి అభికి విసుగొస్తుంది. దీంతో తండ్రి నుండి దూరంగా ఉండాలని సిటీకి వచ్చి కాలేజీలో జాయిన్ అవుతాడు. చిన్ననాటి నుంచి తాను కోల్పోయిన ఫ్రీడమ్ అక్కడ అనుభవిస్తాడు. జీవితంలో ఏది చేసినా సరే ఒక జ్ఞాపకంగా ఎప్పటికీ మిగిలిపోవాలనేది అభి ఫిలాసపీ. దీంతో ప్రతి పనిలోనూ ఛాలెంజ్‌ని కోరుకుంటాడు.

సరిగ్గా అప్పుడే కాలేజీలో స్ఫూర్తి (శ్రీలీల)తో ప్రేమలో పడతాడు. నాలుగేళ్ల పాటు తన వెనకాల తిరిగి స్ఫూర్తి పని చేసే కంపెనీలోనే ఉద్యోగం సంపాదిస్తాడు అభి. అయితే అక్కడ సీఈఓ విజయ సౌజన్య (జెనీలియా)కి మొదటి నుండి అభి అంటే పడదు. దీంతో ఇద్దరి మధ్యా నువ్వా-నేనా అన్నట్లు పరిస్థితి క్రియేట్ అవుతుంది. అయితే ఒక సందర్భంలో విజయ సౌజన్య.. తనకి అస్సలు ఇష్టం లేని అభి సహా తన టీమ్‌తో కలిసి అదే విజయనగరం రావాల్సి వస్తుంది. దానికి కారణమేంటి? ఆ ఊరుకి విజయ సౌజన్యకు లింక్ ఏంటి? విజయ జీవితంలో అసలేం జరిగింది ? అసలు అభి-విజయ సౌజన్యల మధ్య రిలేషన్ ఏంటి? అనేది సినిమా చూసి తెలుసుకోవాలి.

అద్భుతంగా పండిన ఎమోషన్స్

ఈ సినిమా టీజర్, ట్రైలర్ చూసినప్పుడు రొటీన్ లవ్‌స్టోరీ కొత్తగా ఏముంటుంది? అన్న మాట ఎక్కువగా వినిపించింది. నిజానికి అదే ఈ సినిమాకి మెయిన్ ఎట్రాక్షన్ అయింది. ఎలాంటి అంచనాలు లేకుండా కొత్త హీరో ఏం చేస్తాడో చూద్దామనే ఆలోచనతోనే ఎక్కువ మంది ప్రేక్షకులు థియేటర్‌కు వస్తుంటారు. అలాంటి వారిని జూనియర్ అన్ని విధాలుగా ఆకట్టుకుంటుంది. ముఖ్యంగా జూనియర్ సినిమాలో ఎమోషన్స్ అద్బుతంగా పండాయి. ఫస్టాఫ్ కాస్త పడుతూ లేస్తూ సరదాగా సాగిపోతుంది. కానీ ఇంటర్వెల్ బ్లాక్‌తో సినిమా సెకండాఫ్‌కి ప్రేక్షకుల్లో మంచి అంచనాలు ఏర్పడతాయి. ఎక్కడా అంచనాలు తగ్గించకుండా సెకండాఫ్ నడిచింది. ఈ సినిమాలో తండ్రి-కొడుకు, తండ్రి-కూతురు మధ్య రాసుకున్న ప్రతి సీన్ అద్భుతంగా తెరపై ప్రెజెంట్ చేశారు. ఈ విషయంలో దర్శకుడి పనితీరు తెరపై స్పష్టంగా కనిపించింది.

ఎప్పుడైతే కథ బ్యాక్ డ్రాప్ విలేజ్‌కి వెళ్తుందో అక్కడి నుండి సినిమా ఓ లెవల్ కు చేరుకుంటుంది. అయితే అక్కడ జరిగే డెవలప్ మెంట్, టెక్నాలజీ గురించి చెప్పే సీన్లు కొన్ని మహర్షి సినిమాను గుర్తుకు తెస్తుంది. కానీ ఎక్కడా ఆ ఛాయలు కనిపించకుండా కొత్తగా చూపించే ప్రయత్నం అయితే చేశారు దర్శకుడు. అప్పటివరకు ఒకరంటే ఒకరికి పడని అభి-విజయల మధ్య దూరం తగ్గి ఇద్దరూ కలిసి ఊరి కోసం పని చేస్తారు. ఈ సీన్లు అన్నీ థియేటర్లో బాగా వర్కవుట్ అయ్యాయి.

గ్రాండ్ ఎంట్రీ

ఈ సినిమా కోసం కిరీటి రెడ్డి పడిన కష్టం.. తెరపై ప్రతి ఫ్రేమ్లో కనిపించింది. ముఖ్యంగా డ్యాన్స్ విషయంలో మాత్రం కిరీటి అదరగొట్టేశాడు. ప్రతి సాంగ్‌లోనూ కిరీటి స్టెప్పులకి థియేటర్లో మంచి రెస్పాన్స్ వస్తోంది. సాధారణంగా శ్రీలీల స్టెప్పులేస్తుంటే పక్కన ఉన్న వాళ్లని చూడటం చాలా కష్టం. కానీ వైరల్ వయ్యారి పాటలో మాత్రం ఎవరిని చూడాలిరా అన్నట్లుగా ఉంటుంది. డ్యాన్సు మాత్రమే కాకుండా యాక్షన్ సీక్వెన్స్‌లలో కూడా చాలా బాగా కనిపించాడు. ఖచ్చితంగా కిరీటి రాబోయే రోజుల్లో ఓ ప్రామిసింగ్ హీరో అవ్వడం ఖాయం.

అలాగే 13 ఏళ్ల తర్వాత ఈ సినిమాతో టాలీవుడ్‌కి రీఎంట్రీ ఇచ్చింది హ హాసిని జెనీలియా. ఈ సినిమాలో చాలా స్ట్రాంగ్ పాత్రను అంతే ఈజ్‌తో చేసింది. అల్లరి పిల్ల హాసినిగా అప్పుడు అందరినీ నవ్విస్తే ఇప్పుడు ఒక మెచ్యూర్డ్ నటనతో ఆకట్టుకుంది. ఖచ్చితంగా ఈ సినిమాతో జెనీలియా స్ట్రాంగ్ రీఎంట్రీ ఇచ్చిందని చెప్పొచ్చు. ఇక శ్రీలీల పాత్రకి నటనకు పెద్దగా స్కోప్ అయితే లేదు. గ్లామర్ ట్రీట్‌కి, డ్యాన్సుల కోసం మాత్రమే శ్రీలీలని పెట్టినట్లు అనిపించింది. ఇక సినిమాలో కీలక పాత్రల్లో నటించిన వీ రవిచంద్రన్ , రావు రమేష్ హుందాగా కనిపించారు. వైవా హర్ష, సత్య, సుమన్ శెట్టి వాళ్ల పరిధి మేరకు నటించారు.

టెక్నికల్ అంశాలు

దేవిశ్రీ ప్రసాద్ బ్యాక్‌గ్రౌండ్ స్కోర్ గురించి ప్రత్యేకించి చెప్పక్కర్లేదు. ఎందుకంటే బీజీఎమ్‌తో ప్రేక్షకుల కళ్లల్లో నీళ్లు తెప్పించగలడు. వైరల్ వయ్యారి పాట ట్రెండింగులో ఉన్న సంగతి తెలిసిందే. మిగతా సాంగ్స్ కూడా ఫర్వాలేదు. సినిమాటోగ్రాఫర్ సెంథిల్ కుమార్ పనితనం గురించి అందరికీ తెలిసిందే. ప్రతి ఫ్రేమ్‌లో ఆయన వర్క్ కనిపించింది. అవసరమైన మేరకే సీన్లు కట్ చేసి తన పని తనం చూపించుకున్నారు ఎడిటర్. నిర్మాణ విలువలు అయితే చాలా బాగున్నాయి. వారాహి చలనచిత్రం బ్యానర్‌పై సాయి కొర్రపాటి ఈ సినిమాని నిర్మించారు. కర్ణాటకలో ఇప్పటికే ఒక సినిమా డైరెక్ట్ చేసిన రాధాకృష్ణ రెడ్డి ఈ సినిమాని డైరెక్ట్ చేశారు.

ఫైనల్లీ

ఓవరాల్‌గా చెప్పాలంటే జూనియర్ సినిమాతో 'గాలి' వారసుడు గ్రాండ్ ఎంట్రీ ఇచ్చినట్లే. కిరీటి రెడ్డికి ఇది పర్ఫెక్ట్ లాంచ్ ప్యాడ్ అని చెప్పొచ్చు. ఎటువంటి అంచనాలు లేకుండా వెళ్ళిన ప్రేక్షకులను ఈ సినిమా బాగానే ఎంగేజ్ చేస్తుంది.

నటీనటులు: కిరీటి రెడ్డి, శ్రీలీల, జెనీలియా, రావు రమేష్, వీ రవిచంద్రన్

దర్శకుడు: రాధాకృష్ణ రెడ్డి

శైలి: తెలుగు, డ్రామా

వ్యవధి: 2 గం. 34 నిమి.

రేటింగ్: 3.5 / 5