Thalaivi Movie: థియేటర్స్ లోనే కంగనా మూవీ 'తలైవి'

Thalaivi Movie: తలైవి.. అమ్మ సినిమా.. తమిళ తంబీలు ఆత్రంగా ఎదురు చూస్తోన్న సినిమా. అన్నాడీఎంకె ఓడిపోయినా.. డీఎంకె గెలిచినా.. ఇప్పుడు రెండు పార్టీలకు జయలలిత ఇమేజ్ అవసరం పడింది. అందుకే అందరూ ఈ సినిమా కోసం ఎదురు చూస్తున్నారు. కంగనా ప్రతిష్టాత్మకంగా భావించి నటించిన సినిమా తలైవి. ఈ సినిమా రిలీజ్ కోవిడ్ వల్ల వాయిదా పడుతూ వస్తోంది. ఓటీటీలో రిలీజ్ చేస్తారని అందరూ అనుకున్నా.. థియేటర్లు ఓపెన్ అయ్యాకే రిలీజ్ చేయాలని చిత్ర యూనిట్ పట్టుబడుతోందంట.

దివంగత నటి ,రాజకీయనాయకురాలు జయలలిత జీవిత కథ ఆధారంగా తెరకెక్కుతున్న ఈ సినిమాలో కంగన జయలలిత పాత్రలో కనిపించనుంది. విలక్షణ నటుడు అరవింద్ స్వామి ఎంజీఆర్ పాత్రల్లో నటిస్తుండగా.. ఏఎల్ విజయ్ డైరెక్ట్ చేస్తున్నారు. ఇప్పటికే ఈ సినిమానుంచి విడుదలైన పోస్టర్లు సినిమా పైన అంచనాలను పెంచేసింది. తెలుగు తమిళం కన్నడ భాషల్లో 140 పైగా సినిమాల్లో కథానాయికగా విభిన్న పాత్రలు పోషించారు జయలలిత.

జయలలిత జీవితంలోని ప్రధాన అంశాలు ఈ సినిమాలో ఉంటాయట. జయలలిత పదహారేళ్ల వయసు నుండి 60 ఏళ్ల వయసు వరకూ మొత్తం నాలుగు దశలను తలైవి బయోపిక్ లో చూపించనున్నారు. కరోనా తగ్గిన వెంటనే అంటే థియేటర్స్ తెరచుకోగానే రిలీజ్ చేయాలని ప్లాన్ చేస్తున్నారు మేకర్స్. ఈ సినిమా ట్రైలర్ తో ప్రేక్షకులలో భారీ అంచనాలను క్రియేట్ చేసింది. అదే విధంగా ఏప్రిల్ 23న రిలీజ్ చేయనున్నట్లు కూడా ప్రకటించింది చిత్రబృందం. కానీ కోవిడ్ వలన సినిమా వాయిదా పడటంతో తలైవి రిలీజ్ పై డిఫరెంట్ టాక్స్ వినిపిస్తున్నాయి.