Pushpa 2 Original Collections: ఐటి రైడ్స్‌తో పుష్ప2 అసలు కలెక్షన్స్ గుట్టు రట్టు..

Pushpa 2 Original Collection: అల్లు అర్జున్ హీరోగా సుకుమార్ దర్శకత్వంలో తెరకెక్కిన మూవీ పుష్ప2. డిసెంబర్ 5న విడుదలైన ఈ సినిమా సంచలన విజయం సాధించింది. ఇక నార్త్‌లో అన్ని రికార్డులను పుష్ప 2 తుడిపేసింది. రికార్డు స్థాయిలో కలెక్షన్లు రాబట్టింది. ఈ నేపథ్యంలో దర్శక, నిర్మాతల ఇళ్లల్లో ఐటీ రైడ్స్ జరుగుతున్నాయి. దీంతో పుష్ప2 అసలు కలెక్షన్లు ఎంత అనే చర్చ మొదలైంది.

పుష్ప 2 సినిమా కలెక్షన్ల సునామీ సృష్టించింది. హిందీలో స్టార్ హీరోలకు సాధ్య కానీ రికార్డులను పుష్ప2 సినిమాతో అల్లు అర్జున్ రికార్డ్ క్రియేట్ చేశారు. బాలీవుడ్‌లో రూ. 806 కోట్లు వసూలు చేసి అందర్నీ ఆశ్చర్యపరిచింది. ఈ సినిమా ప్రపంచ వ్యాప్తంగా రూ.1832 కోట్లకు పైగా గ్రాస్ వసూళ్లును సాధించినట్టు చిత్ర నిర్మాతలు అధికారికంగా పోస్టర్స్ విడుదల చేశారు. దీంతో ఐటీ అధికారులు మైత్రీ మూవీ మేకర్స్‌కు సంబంధించిన నిర్మాతలతో పాటు దర్శకుడు సుకుమార్ ఇళ్లు, కార్యాలయాలపై ఏక కాలంలో దాడులు నిర్వహిస్తున్నారు.

పోస్టర్‌పై వేసిన కలెక్షన్స్‌కు సంబంధించిన ప్రతి రూపాయి లెక్క అడిగి దర్శక, నిర్మాతలను పలు ప్రశ్నలతో ఉక్కిరి బిక్కిరి చేసినట్టు తెలుస్తోంది. సుకుమార్‌ను ఎయిర్ పోర్టులో పట్టుకుని ఆయన ఇంటికి, కార్యాలయాలకు తీసుకెళ్లి పలు ప్రశ్నలు అడినట్టు సమాచారం.

డైరెక్టర్ సుకుమార్ ఇంట్లో రెండో రోజు ఐటీ సోదాలు కొనసాగుతున్నాయి. పుష్ప2 నిర్మాణంలో సుకుమార్‌కి షేర్స్ ఉన్నట్టు తెలుస్తోంది. మరోవైపు మైత్రీ మూవీ మేకర్స్ సంస్థలో, ఎస్‌వీసీ, మైత్రి, మ్యాంగో మీడియా సంస్థల్లో మూడో రోజు సోదాలు కొనసాగుతున్నాయి. అసలు సినిమాకు పెట్టిన పెట్టుబడి ఎంత? వచ్చిన ఆదాయం ఎంత? అనే కోణంలో ఆరా తీస్తున్నట్టు తెలుస్తోంది. సినిమా పెట్టుబడి.. వచ్చిన ఆదాయం, కడుతున్న ఇన్‌కం ట్యాక్స్ విషయంలో అధికారులు రికార్డులను పరిశీలిస్తున్నట్టు తెలుస్తోంది.

పుష్ప2 రూ.1800 కోట్లకు పైగా గ్రాస్ వసూళ్లు రాబట్టినట్టు నిర్మాతలు పోస్టర్స్ ను విడుదల చేశారు. కానీ తీరా లెక్కల్లో దాదాపు రూ.531 కోట్లకు పైగా తేడా వచ్చినట్టు ఐటీ అధికారులు గుర్తించారు. కొంతమంది అల్లు అర్జున్న ఫ్యాన్స్ పుష్ప2 సినిమా రూ.2200 కోట్లు వసూళ్లు చేస్తే.. నిర్మాతలు కేవలం రూ.1800 కోట్లకు పైగా వసూలు చేసినట్టు మాత్రమే పోస్టర్స్ వేసుకున్నారని చెప్పుకొచ్చారు. ఫస్ట్ ప్లేస్‌లో ఉన్న దంగల్ సినిమా వసూళ్లను పుష్ప2 క్రాస్ చేసినట్టు చెప్పుకుంటున్నారు. రూ.2200 కోట్లు కలెక్ట్ చేసినట్టు పోస్టర్ రెడీ చేసి.. పలు సోషల్ మీడియా హ్యాండిల్స్‌తో ప్రమోట్ చేస్తున్నారు.

ఇదిలా ఉంటే.. రూ.1800 కోట్లకు పైగా వసూళ్లు చేసినట్టు పోస్టర్స్ రిలీజ్ చేసిన మైత్రీ మూవీ మేకర్స్ మాత్రం.. పుష్ప2 మూవీకి సంబంధించి రూ.1250 కోట్ల గ్రాస్‌కు మాత్రమే టాక్స్ చెల్లించినట్టు సమాచారం. దీంతో పుష్ప2 సినిమా అసలు కలెక్షన్ కేవలం రూ.1250 కోట్లేనా అనే సందేహం వ్యక్తమవుతోంది. రూ.531 కోట్లు ఎక్కువ వచ్చాయా? లేక తక్కువ వచ్చాయా అనేది తెలియాల్సి ఉంది. లేదంటే నిర్మాతలు ఎక్కువ మొత్తంలో టాక్స్‌ను ఎగ్గొట్టారా అనేది తెలియాల్సి ఉంది. మరి ఐటీ సోదాల్లో ఎలాంటి విషయాలు బయటకు వస్తాయో చూడాలి.