'ఆర్ఆర్ఆర్‌'లోని కొమ్మ ఉయ్యాల‌.. అంటూ పాట పాడిన గాయ‌ని ఎవ‌రో తెలుసా?

RRR Movie: భారీ వసూళ్లతో బాక్సాఫీస్‌ రికార్డ్స్‌ని తిరగరాస్తోన్న బిగ్గెస్ట్‌ యాక్షన్‌, ఫిక్షనల్‌ డ్రామా ఆర్‌ఆర్‌ఆర్‌. దర్శకధీరుడు రాజమౌళి రూపొందించిన ఈ సినిమాలో రామ్‌చరణ్‌, తారక్‌ కీలకపాత్రలు పోషించిన సంగతి తెలిసిందే. అయితే ఈ సినిమా విడుదలైన తర్వాత మల్లి పాత్ర గురించి సోషల్ మీడియాలో ట్రెండ్ అవుతుంది. ఆర్ఆర్ఆర్ సినిమా మల్లి పాత్రతో మొదలు కావడం… సినిమా మొత్తం మల్లి అనే పాత్ర పైనే ఆధారపడి ఉంటుంది.

సినిమా ప్రారంభం మల్లి పాత్రతో మొదలవుతుంది. ఈ గిరిజన బాలిక పాడే కొమ్మా ఉయ్యాల.. కోనా జంపాల అనే పాటకు ఆడియన్స్ ఫిదా అయ్యారు. ఆ గాత్రం సంగీత ప్రియులను అలరించింది. ఈ లిరికల్ సాంగ్ విడుదల చేసే ప్రయత్నంలో ఉంది చిత్ర యూనిట్. సినీ ప్రియులను ఇంతగా ఆకట్టుకున్న ఈ పాటను పాడింది కర్ణాటకకు చెందిన ప్రకృతి రెడ్డి. చిన్నతనం నుంచి సంగీతం అంటే ఇష్టమున్న ఆమెకు తల్లిదండ్రులు సంప్రదాయ సంగీతంలో శిక్షణ ఇప్పించారు. ఓ పక్క చదువుకుంటూనే మరోపక్క సంగీత పోటీల్లోనూ పాల్గొంటూ తన ప్రతిభను చాటిచెప్పింది ప్రకృతి. బుల్లితెరపై ప్రసారమయ్యే ఎన్నో కార్యక్రమాల్లోనూ పాల్గొని తన గాత్రంతో జడ్జిలనే ఆశ్చర్యంలో ముంచెత్తింది. కన్నడలోనే కాకుండా.. తెలుగు, తమిళం, హిందీలోనూ పాటలు పాడడం నేర్చుకుంది.