Pushpa 2 Ticket Price Hike: ఏపీలో పుష్ప 2 మూవీ టికెట్ ధరల పెంపునకు సర్కార్ గ్రీన్ సిగ్నల్

Pushpa 2 Ticket Price In AP: అల్లు అర్జున్ హీరోగా వస్తున్న పుష్ప 2 సినిమా టికెట్ ధరల పెంపునకు ఏపీ సర్కార్ గ్రీన్ సిగ్నల్ ఇచ్చింది. ఈ మేరకు అధికారిక జీవోను కూడా విడుదల చేసింది. అల్లు అర్జున్ హీరోగా సుకుమార్ డైరెక్షన్ లో రూపొందించిన ఈ యాక్షన్ త్రిల్లర్ మూవీలో రష్మీక హీరోయిన్. డిసెంబర్ 5వ తేదీన ప్రపంచవ్యాప్తంగా ఈ మూవీ ప్రేక్షకుల ముందుకు రానుంది. ఈ సందర్భంగా ఏపీ వ్యాప్తంగా టికెట్ ధరలు పెంచుకునేందుకు ప్రభుత్వం అనుమతి ఇచ్చింది. డిసెంబర్ 4 రాత్రి 9.30గంటలకు బెనిఫిట్ షోతోపాటు అర్థరాత్రి 1గంట షోకు కూడా పర్మిషన్ ఇచ్చింది.

రాత్రి 9.30 షోకు టికెట్ ధరను రూ. 800గా నిర్ణయించారు. దీనికి జీఎస్టీ అదనంగా ఉంటుంది. ఈ షో చూడాలనుకుంటే రాష్ట్ర వ్యాప్తంగా సింగిల్ స్క్రీన్, మల్టీప్లెక్స్ ఏదైనా రూ. 800 ప్లస్ జీఎస్టీ కూడా చెల్లించాలి. ఈ మూవీ రిలీజ్ అయిన రోజు డిసెంబర్ 5న ఆరు షోలకు అనుమతి ఇచ్చింది ప్రభుత్వం. టికెట్ ధరల పెంపునకు అనుమతి ఇచ్చిన ఏపీ ముఖ్యమంత్రి చంద్రబాబు నాయుడు, డిప్యూటీ సీఎం పవన్ కల్యాణ్ లకు అల్లు అర్జున్ కృతజ్ఞతలు తెలిపారు.