ముందెప్పుడూ చూడని పాత్రలో మహేష్ బాబు

టాలీవుడ్ సూపర్ స్టార్ మహేష్ బాబు ప్రస్తుతం 'మహర్షి' సినిమాతో బిజీగా ఉన్న సంగతి తెలిసిందే. మహేష్ కెరీర్ లో 25వ చిత్రంగా ప్రేక్షకుల ముందుకు రాబోతున్న ఈ చిత్రానికి వంశీ పైడిపల్లి దర్శకత్వం వహిస్తున్నారు. దిల్ రాజు, పివిపి, అశ్వినీదత్ నిర్మిస్తున్న ఈ సినిమా మే 9 వ తారీకు న విడుదల కానుంది. ఇక ఈ సినిమా పూర్తయిన వెంటనే మహేష్ బాబు ఈ మధ్యనే 'ఎఫ్ 2' సినిమాతో బ్లాక్ బస్టర్ అందుకున్న అనిల్ రావిపూడి దర్శకత్వంలో ఒక సినిమా చేయనున్నాడు. ఇప్పటికే అధికారిక ప్రకటన కూడా వెలువడింది. ఈ సినిమా గురించి ఒక ఆసక్తికరమైన వార్త ఇప్పుడు సోషల్ మీడియాలో హల్చల్ చేస్తోంది.

తాజా సమాచారం ప్రకారం మహేష్ బాబు ఈ సినిమాలో ఒక మిలిటరీ మ్యాన్ గా కనిపించనున్నాడట. ఇప్పటి దాకా ఇలాంటి పాత్ర మహేష్ బాబు ఎప్పుడూ చేయలేదు. కాబట్టి ఈ సినిమా పై మరింత ఆసక్తి ఏర్పడింది. మిలిటరీ ఆఫీసర్ గా మహేష్ బాబు లుక్స్ ఎలా ఉంటాయా అని ఆసక్తిగా ఎదురు చూస్తున్నారు అభిమానులు. దిల్ రాజు మరియు అనిల్ సుంకర ఈ సినిమాను సంయుక్తంగా నిర్మిస్తున్నారు. ఈ సినిమాలో హీరోయిన్ గురించి పలు పేర్లు వినిపించినప్పటికీ ఇంకా అధికారిక ప్రకటన వెలువడాల్సి ఉంది. ఈ సినిమా గురించి మరిన్ని వివరాలు త్వరలో తెలియనున్నాయి.