"పుష్ప" లో సాయి పల్లవి పాత్ర పై క్లారిటీ

Pushpa 2: స్టైలిష్ స్టార్ అల్లు అర్జున్ హీరోగా నటించిన "పుష్ప" సినిమా బాక్సాఫీస్ వద్ద బ్లాక్ బస్టర్ గా నిలిచిన సంగతి తెలిసిందే. ప్యాన్ ఇండియన్ సినిమాగా విడుదలైన ఈ చిత్రం తెలుగు రాష్ట్రాల్లో మాత్రమే కాక ప్రపంచవ్యాప్తంగా మంచి కలెక్షన్లను నమోదు చేసుకుంది. ఇక ఈ సినిమాకి రెండవ భాగమైన "పుష్ప: ది రూల్" కోసం అభిమానులు ఆసక్తిగా ఎదురు చూస్తున్నారు. సుకుమార్ దర్శకత్వంలో ఈ సినిమా షూటింగ్ ఈ మధ్యనే పట్టాలెక్కింది. అయితే గత కొంతకాలంగా "పుష్ప" రెండవ పార్ట్ కథ గురించి నటీనటుల గురించి ఎన్నో వార్తలు ఎప్పటికప్పుడు బయటకు వస్తూనే ఉన్నాయి.

అందులో ఒకటి ఈ సినిమాలో స్టార్ బ్యూటీ సాయి పల్లవి కూడా కీలక పాత్రలో కనిపిస్తోంది అని. ఈ సినిమాలో సాయి పల్లవి ఒక ట్రైబల్ అమ్మాయిగా కనిపించబోతోంది అని వార్తలు వినిపించాయి. అయితే తాజాగా ఈ పుకార్లపై రియాక్ట్ అయింది చిత్ర బృందం. సినిమాలో హీరోయిన్ పాత్ర కోసం కేవలం రష్మిక మందన్న మాత్రమే ఉంటుందని మరో హీరోయిన్ పాత్ర కూడా ఈ సినిమాలో లేదని, అలానే సాయి పల్లవికి కూడా సినిమా ఆఫర్ వెళ్ళలేదని చెప్పుకొచ్చింది చిత్ర బృందం. దీంతో ఎప్పటినుంచో బన్నీ సరసన సాయి పల్లవిని చూడాలనుకున్న ఆమె అభిమానులు కొంత నిరాశ చెందారని చెప్పుకోవచ్చు.