శేఖర్ సినిమా ప్రదర్శనలు నిలిపివేత .. రాజశేఖర్‌ ఎమోషనల్‌ ట్వీట్‌..

Shekar Movie: హీరో రాజశేఖర్ నటించిన శేఖర్ సినిమా ప్రదర్శనలను నిలిపివేయాలని సిటీ సివిల్ కోర్టు ఆదేశించింది. హీరో రాజశేఖర్ తనకు డబ్బులు ఇవ్వాలని ఫైనాన్షియర్ పరంధామ రెడ్డి కోర్టును ఆశ్రయించారు. పిటిషన్ పరిశీలించిన కోర్టు ఫైనాన్సియర్ ‌కు ఇవ్వాల్సిన డబ్బుల్ని డిపాజిట్ చేయాలని సూచించింది. బ్యాంకులో కోర్టు సూచించిన విధంగా డిపాజిట్ కాకపోవడంతో సినిమా ప్రదర్శనలను నిలిపివేయాలని కోర్టు ఆదేశాలు జారీచేసింది. గత శుక్రవారమే ప్రేక్షకుల ముందుకొచ్చిన శేఖర్ సినిమాకు జీవిత దర్శకత్వం వహించారు.

కాగా, శేఖర్ సినిమా ప్రదర్శన నిలిపివేతపై ట్విటర్‌ వేదికగా రాజశేఖర్‌ స్పందించారు.'శేఖర్ చిత్రాన్ని నేను, నా కుటుంబం మా సర్వస్వంగా భావించాం. ఈ సినిమాను ప్రేక్షకుల ముందుకు తీసుకువచ్చేందుకు చాలా కష్టపడ్డాం. శేఖర్ చిత్రానికి ప్రేక్షకుల నుంచి విశేష స్పందన లభిస్తోంది. కానీ, ఇంతలోనే కొందరు కావాలనే మా చిత్రాన్ని అడ్డుకుంటున్నారు. సినిమా అనేది మా ప్రాణం. 'శేఖర్‌' మాకు చాలా ప్రత్యేకం. ఇక నేను చెప్పాల్సిందేమీ లేదు.... ఎవరెన్ని చేసినా ఈ చిత్రం ప్రదర్శితమై, ప్రశంసలు పొందుతుందని, ఆ అర్హత ఈ సినిమాకు ఉందని నేను భావిస్తున్నాను' అంటూ రాజశేఖర్ ట్వీట్‌ చేశాడు.