మరొక మల్టీస్టార్రర్ లో కామెడీ హీరో

కామెడీ హీరోగా అల్లరి నరేష్ తన కెరీర్ లో చాలానే సూపర్ హిట్లు అందుకున్నాడు.కానీ గత కొంతకాలంగా నరేష్ ఒక్క హిట్టు కూడా అందుకోలేదు. చాలా సినిమాలు డిజాస్టర్ గా మారిన తర్వాత ఈ మధ్యనే మహేష్ బాబు హీరోగా నటిస్తున్న 'మహర్షి' సినిమాలో ముఖ్య పాత్ర పోషించేందుకు సిద్ధమయ్యాడు. ఈ సినిమా అల్లరి నరేష్ కెరీర్ కు ఒక టర్నింగ్ పాయింట్ గా మారుతుందని అభిమానులు కూడా ఆశిస్తున్నారు. అయితే తాజాగా ఈ సినిమా ఇంకా విడుదల కాలేదు కానీ అప్పుడే అల్లరి నరేష్ కు మరొక అవకాశం వచ్చినట్లు తెలుస్తోంది. అల్లరి నరేష్ హీరోగా ప్రముఖ దర్శకుడు ఎస్.వి.కృష్ణా రెడ్డి ఓ సినిమాని తెరకెక్కించనున్నారట.

ఈ సినిమా ఒక మల్టీస్టార్రర్ అని, వేరొక హీరో కూడా ఈ సినిమాలో నటిస్తారని తెలుస్తోంది. ఈ చిత్రాన్ని ఎస్వీఆర్ మీడియా అధినేత శోభారాణి నిర్మించనున్నారు. తమిళ హీరో విజయ్ 'తుపాకి', 'పులి' వంటి భారీ చిత్రాల్ని తెలుగులో రిలీజ్ చేసింది ఈ సంస్థ. సుమారు 50 పైగా ఆంగ్ల- తమిళ అనువాద చిత్రాల్ని తెలుగు ప్రేక్షకులకు అందించిన సంస్థ ఇప్పుడు నరేష్ తో మల్టీస్టార్రర్ నిర్మించనుంది. 'మహర్షి' రిలీజ్ తర్వాత ఈ సినిమా గురించిన అధికారిక ప్రకటన వెలువడే అవకాశం ఉందని తెలుస్తోంది. అల్లరి నరేష్ ఇంతకుముందే సునీల్ తో 'సిల్లి ఫెల్లోస్' అనే మల్టీస్టారర్ చిత్రంలో నటించాడు కానీ ఆ సినిమా డిజాస్టర్ అయింది.