దేవసేన కోసం హాలీవుడ్ నటుడు

తెలుగులో లేడీ ఓరియంటెడ్ సినిమా అంటే గుర్తొచ్చేది ముందుగా అనుష్క పేరే. టాలీవుడ్ స్వీటీ అనుష్క శెట్టి ఇప్పటికే 'అరుంధతి', 'పంచాక్షరి' లాంటి లేడీ ఓరియంటెడ్ చిత్రాల్లో నటించింది. గతేడాది మొదట్లో 'భాగమతి' అనే చిత్రంలో కూడా కనిపించి సూపర్ హిట్ అందుకున్న అనుష్క కొన్నాళ్లు వెండితెరకు దూరంగా ఉన్న సంగతి తెలిసిందే. బాగా బరువుతగ్గిన అనుష్క ఇప్పుడు మళ్లీ ఒక వుమన్ సెంట్రిక్ చిత్రంలో నటించేందుకు సిద్ధమవుతోంది. 'సైలెన్స్' అనే టైటిల్ తో ఈ సినిమా ప్రేక్షకుల ముందుకు రాబోతోంది. అయితే తాజాగా ఈ సినిమా గురించి ఒక ఆసక్తికరమైన వార్త బయటకు వచ్చింది.

ఈ సినిమాలో హాలీవుడ్ నటుడు మైకెల్ మ్యాడ్సన్ ఒక కీలకమైన పాత్రలో కనిపించనున్నాడట. దాదాపు తన కెరియర్ లో 50కి పైగా హాలీవుడ్ సినిమాలో కనిపించిన మైకేల్ 'కిల్ బిల్', 'స్పీసీస్' లాంటి హిట్ చిత్రాలను కూడా అందుకున్నాడు. ఇక 'సైలెన్స్' సినిమా కథ నచ్చడంతో తెలుగు సినిమా చేసేందుకు ఒప్పుకున్నాడు మైకేల్. ఈ సినిమా షూటింగ్ లోని సింహ భాగం మొత్తం అమెరికాలోనే జరగనుందట. సినిమా మొదటి షెడ్యూల్ నుంచి మైకేల్ సెట్స్ కి రానున్నారని తెలుస్తోంది. ఇక ఈ సినిమాలో ఆర్ మాధవన్, అవసరాల శ్రీనివాస్ కూడా ముఖ్య పాత్ర పోషిస్తున్నారు.