Prevention Of Heart Attack: ఇలా నడిస్తే.. గుండె పోటు అస్సలు రాదు..!

Health: గుండె ఆరోగ్యం చాలా మందిని ఆందోళనకు గురిచేసే విషయం. కానీ దీన్ని మెరుగుపరచడానికి కొన్ని సరళమైన మార్గాలు ఉన్నాయి. వాటిలో ఒకటి వేగంగా నడక. నడక సాధారణ వ్యాయామంగా చాలా మందికి తెలిసినప్పటికీ, నడక వేగం గుండె ఆరోగ్యంపై ఎంత ప్రభావం చూపుతుందో చాలా మందికి తెలియదు. పరిశోధనల ప్రకారం, వేగంగా నడిచే వ్యక్తులకు గుండె జబ్బులు వచ్చే అవకాశం చాలా తక్కువగా ఉంటుంది. మెల్లగా నడిచేవారికి గుండె సంబంధిత సమస్యలు తలెత్తే ప్రమాదం ఎక్కువగా ఉంటుందని అధ్యయనాలు సూచిస్తున్నాయి.

వేగంగా నడక ఒక రకమైన కార్డియోవాస్కులర్ వ్యాయామం, ఇది గుండె, ఊపిరితిత్తులు, రక్తనాళాల పనితీరును మెరుగుపరచడంలో సహాయపడుతుంది. శరీరం శక్తివంతంగా పనిచేయాలంటే కండరాలకు తగినంత ఆక్సిజన్, పోషకాలు అందాల్సిన అవసరం ఉంటుంది. వేగంగా నడవడం ద్వారా రక్త ప్రసరణ వ్యవస్థ మెరుగుపడుతుంది, గుండె ఎక్కువ శ్రమ లేకుండా పనిచేస్తుంది. నడక వేగం మన శరీర సామర్థ్యానికి, కండర బలానికి, ఊపిరితిత్తుల పనితీరుకు అద్దం పట్టినట్లుంటుంది. వేగంగా నడిచేవారికి గుండె సంబంధిత వ్యాధులు తక్కువగా వస్తాయని శాస్త్రీయ అధ్యయనాలు సూచిస్తున్నాయి. రోజూ 30-40 నిమిషాలు వేగంగా నడవడం వల్ల రక్తపోటు నియంత్రణలో ఉంటుంది, కొలెస్ట్రాల్ స్థాయులు తగ్గుతాయి.

వేగంగా నడవటం ద్వారా కేలరీలు త్వరగా ఖర్చయి, బరువు తగ్గేందుకు దోహదపడుతుంది. అధిక బరువు గుండెకు మితిమీరిన ఒత్తిడిని కలిగిస్తుంది. కాబట్టి వేగంగా నడవటం వల్ల బరువు నియంత్రణలో ఉండి గుండె ఆరోగ్యాన్ని రక్షించుకోవచ్చు. వేగంగా నడవడం మెదడు పనితీరును కూడా మెరుగుపరిచేలా పనిచేస్తుంది. ఇది మెమరీ పవర్‌ను పెంచి, మానసిక ఆరోగ్యాన్ని మెరుగుపరుస్తుంది. అయితే గతంలో వేగంగా నడిచే వ్యక్తి, ఏదైనా ఆరోగ్య సమస్యల కారణంగా నెమ్మదిగా నడవాల్సిన పరిస్థితిని ఎదుర్కొంటే, అది గుండె లేదా శరీర సామర్థ్యంలో వచ్చిన మార్పుల గురించి సూచనగా భావించవచ్చు.

అయితే ఒకేసారి వేగంగా నడవకూడదని నిపుణులు చెబుతున్నారు. మెల్లగా మొదలుపెట్టి క్రమంగా వేగాన్ని పెంచాలి. రోజుకు కనీసం 30-40 నిమిషాలు వేగంగా నడవాలి. మెత్తటి సోల్ కలిగిన షూస్ ధరించడం, తగినంత నీరు తాగడం అవసరం. సరిగా శ్వాస తీసుకుంటూ, నడకను ఆహ్లాదకరంగా మార్చుకోవాలి.

నోట్‌: పైన తెలిపిన విషయాలు ఇంటర్నెట్‌ వేదికగా అందుబాటులో ఉన్న సమాచారం ఆధారంగా అందించడం జరిగింది. ఆరోగ్యానికి సంబంధించి వైద్యుల సూచనలు పాటించడమే ఉత్తమం.