Sikkim: అందమైన సిక్కిం.. కానీ అడుగడుగునా అపాయం..!

Sikkim: సిక్కిం అనే పేరు వినగానే మనకు ముందుగా గుర్తుకొచ్చేది అక్కడి ప్రకృతి అందాలు. మంచుతో కప్పబడిన కొండలు, ప్రవహించే నదులు, హరిత వనాలు చూస్తే మనసు చాలా ప్రశాంతంగా ఉంటుంది. కానీ ఈ ప్రదేశం ఎంత అందంగా ఉంటుందో అంతే ప్రమాదకరంగా కూడా ఉంటుంది. ఎందుకంటే, సిక్కిం చాలా ఎత్తైన ప్రాంతంలో ఉంటుంది. అందువల్ల ఇక్కడ వాతావరణం తరచూ మారుతూ ఉంటుంది. ఎప్పుడైనా అకస్మాత్తుగా హిమపాతం, భారీ వర్షాలు, తుఫానులు సంభవించవచ్చు. కొండచరియలు విరిగిపడే ప్రమాదం కూడా ఎక్కువగా ఉంటుంది. అంతేకాకుండా, కొన్ని ప్రాంతాల్లో అడవి జంతువుల ముప్పు కూడా ఉంటుంది. ఈ కారణాల వల్ల అక్కడకు వెళ్లే పర్యాటకులు చాలా జాగ్రత్తగా ఉండాలి.

సిక్కింలోని కొంతమంది స్థానికులు భూకంపాలు, వర్షాలతో కలిగే ప్రమాదాలను ఎదుర్కొంటూనే జీవితం సాగిస్తున్నారు. ఇలాంటి ప్రాంతాల్లో ప్రయాణించాలంటే ముందుగా వాతావరణ సమాచారం తెలుసుకోవడం, ఒక మంచి గైడ్‌ను తీసుకుని వెళ్లడం చాలా అవసరం. ఇటీవల ఉత్తరప్రదేశ్‌లోని ప్రతాప్‌ గఢ్‌కు చెందిన నూతన దంపతులు కౌశలేంద్ర ప్రతాప్ సింగ్, అంకితా సింగ్ హనీమూన్ కోసం సిక్కింకు వెళ్లారు. మే 5న వారు వివాహం చేసుకుని, మే 24న సిక్కింకు బయలుదేరారు. అయితే మే 29 సాయంత్రం వారు ప్రయాణిస్తున్న కారు మంగన్ జిల్లాలోని తీస్తా నదిలో పడిపోయింది.

కారు మున్సితాంగ్ సమీపంలో కొండచరియలు విరిగిపడడంతో రోడ్డుపై నుంచి జారిపడి సుమారు 1000 అడుగుల లోతులోకి పడిపోయింది. కారు లోపల కౌశలేంద్ర, అంకితతో పాటు మరో ఎనిమిది మంది పర్యాటకులు ఉన్నారు. వీరంతా ఒక్కసారిగా అదృశ్యమయ్యారు. ప్రస్తుతం NDRF, అగ్నిమాపక సిబ్బంది, అటవీ శాఖ, పర్యాటక శాఖ, ట్రావెల్ ఏజెంట్స్ సంఘం అధికారులు, పోలీసులు గాలింపు చర్యలు కొనసాగిస్తున్నారు.

గమనించవలసిన విషయం:

సిక్కింలో ప్రకృతి అందాలు ఎంత ఆకర్షణీయంగా ఉన్నా అక్కడి వాతావరణ పరిస్థితులు, భౌగోళిక నిర్మాణం, వన్యప్రాణుల ముప్పు వంటి అంశాలు చాలా జాగ్రత్తగా పరిగణించాలి. ప్రయాణం ముందు పూర్తి సమాచారం సేకరించి, తగిన ముందు జాగ్రత్తలు తీసుకోవడమే మంచిది.