Digital Detox: సోషల్ మీడియా మిమ్మల్ని నియంత్రిస్తోందా? ఇప్పుడు మీరు దాన్ని నియంత్రించే సమయం

Digital Detox: ఈ రోజుల్లో ప్రతి ఒక్కరు నోటిఫికేషన్ల మధ్య, రీల్స్‌, బ్రేకింగ్ న్యూస్‌ల మధ్య బతుకుతున్నారు. మన మెదడు క్షణం కూడా విశ్రాంతి తీసుకునే అవకాశం లేకుండా టెక్నాలజీతో మిళితమైపోయింది. ఫోన్ స్క్రోల్ చేయడం ఒక అవసరం కాకుండా ఒక రిఫ్లెక్స్‌గా మారిపోయింది. ప్రతిసారి స్క్రోల్ చేయగానే మన మెదడులోని డోపమైన్ అనే రివార్డ్ కెమికల్ యాక్టివేట్ అవుతుంది. మనం ఏమీ సాధించకపోయినా, ఏదో గొప్పదాన్ని పొందామన్న ఫీలింగ్ కలుగుతుంది. ఈ అలవాటు మన శాంతతను చిల్లుని తెస్తుంది.

ఇలాంటి స్థితిలో 'డిజిటల్ డిటాక్స్' ఒక మార్గంగా ఎదిగింది. నిపుణులు చెబుతున్నట్లు ఇది టెక్నాలజీని వదిలేయడం కాదు. దాన్ని మన నియంత్రణలోకి తీసుకురావడం. సామాన్యంగా వినిపించే 'డిటాక్స్' అనే పదానికి ఇక్కడ మరొక అర్థం ఉంది – మన ఆత్మవిశ్వాసాన్ని తిరిగి పొందే మార్గం.

ఇంటిగ్రేటివ్ లైఫ్‌స్టైల్ నిపుణుడు ల్యూక్ కౌటిన్హో తెలిపినట్టు, నిరంతర సమాచారం వల్ల మన శక్తి, స్పష్టత తగ్గిపోతుంటుంది. సోషల్ మీడియా మనం ఎదుటివారితో పోల్చుకునే తత్వాన్ని పెంచుతుంది. మన సమాధానాలు కూడా రియాక్షన్ల రూపంలో మారిపోతుంటాయి. అలాంటప్పుడు ఒక్క 8 రోజుల డిజిటల్ డిటాక్స్‌ జీవితం మీద తీవ్రమైన ప్రభావం చూపగలదు.

డిజిటల్ డిటాక్స్ తరువాత జీవితం మారిపోతుంది. నిద్ర మెరుగవుతుంది. మనం మాట్లాడే మాటలు శాంతంగా ఉంటాయి. స్క్రీన్ మళ్లీ మన మనసును నియంత్రించదు. మనం నడకలకు వెళ్తాం. పుస్తకాలను చదువుతాం. నిజమైన వ్యక్తులతో మమేకం అవుతాం. సెల్‌ఫోన్‌ను చూసేటప్పుడల్లా ఒక్కసారి ఆగి, ‘నిజంగా నేను ఏమి వెతుకుతున్నాను?’ అని మనల్ని మనమే ప్రశ్నించగలమంటే అదే స్పృహతో జీవించే మొదటి అడుగు.

ల్యూక్ సూచించిన మరో ముఖ్యమైన ఆచరణ ఏమిటంటే—మీ ఫీడ్‌ను పరిశీలించండి. మీకు స్ట్రెస్ తెచ్చే, అసౌకర్యంగా అనిపించే ఖాతాలను అన్‌ఫాలో చేయండి. సోషల్ మీడియా వేదికలు మన ప్రాధాన్యాలపై ఆధారపడి కంటెంట్ చూపిస్తాయి. మనం ఎంచుకునే దానిపైనే అనుభవం ఆధారపడి ఉంటుంది.

ఇది ఓ ఫ్యాషన్ కాదు. ఇది మన మానసిక ఆరోగ్యానికి అవసరమైన సాధనం. వ్యక్తిగతంగా, కుటుంబంగా, ఉద్యోగ స్థాయిలో కూడా దీన్ని అమలు చేయొచ్చు. ఒకరోజు స్క్రీన్‌లకు దూరంగా ఉండటం మొదటి అడుగు. ఉదయం లేచిన తరువాత మొదటి గంట ఫోన్ చూడకుండా గడపండి. స్పష్టత నోటిఫికేషన్ల ద్వారా కాదు – మిమ్మల్ని మీరు పరిశీలించడంలో నుంచే వస్తుంది.

ఇప్పుడు మీరు నిర్ణయం తీసుకోండి — టెక్నాలజీని మీరు వాడతారా? లేక అది మిమ్మల్ని వాడుతుందా?