Eye Health: ఈ పోషకాల లోపం కారణంగా కంటిచూపు మందగిస్తుంది.. అజాగ్రత్తగా ఉంటే అద్దాలు తప్పవు..!

Eye Health: కళ్లు లేకుంటే జీవితం అంధకారంగా మారుతుంది. దృష్టి అస్పష్టంగా ఉందని భావిస్తే పోషకాల లోపం ఉన్నట్లే. కళ్లద్దాల అవసరం ఏర్పడవచ్చు. రోజువారీ ఆహారంలో శక్తివంతమైన విటమిన్లు, యాంటీఆక్సిడెంట్లు, ఖనిజాలను చేర్చడం వల్ల కంటి ఆరోగ్యంపై దృష్టి పెట్టవచ్చు. విటమిన్ సి, విటమిన్ ఇ, జింక్, లుటిన్, జియాక్సంతిన్ వంటి పోషకాలు కంటి చూపును మెరుగుపరుస్తాయి. ఈ పోషకాలు కళ్లకు ఎందుకు ముఖ్యమో తెలుసుకుందాం.

1.లుటీన్ & జియాక్సంతిన్

లుటీన్, జియాక్సంతిన్ దీర్ఘకాలిక కంటి వ్యాధుల ప్రమాదాన్ని తగ్గిస్తాయి. లుటీన్, జియాక్సంతిన్ ఎక్కువగా ఉన్న వ్యక్తులకు కంటిశుక్లం వచ్చే ప్రమాదం చాలా తక్కువ. దీని కోసం బ్రోకలీ, మొక్కజొన్న, బఠానీలు, టాన్జేరిన్లను తినాలి.

2. విటమిన్ సి

విటమిన్ సి కంటిశుక్లం ప్రమాదాన్ని తగ్గిస్తుంది. అస్పష్టమైన దృష్టిని తగ్గిస్తుంది. దీని కోసం నారింజ, ద్రాక్ష, స్ట్రాబెర్రీ, బొప్పాయి, పచ్చిమిర్చి, టమోటాలు, నిమ్మకాయలను తినడానికి ప్రయత్నించండి.

3. విటమిన్ ఈ

విటమిన్ E కళ్లలోని కణాలను రక్షిస్తుంది. కూరగాయల నూనెలు, గింజలు, గోధుమ, చిలగడదుంపల్లో ఎక్కువుగా లభిస్తుంది.

4. ఎసెన్షియల్ ఫ్యాటీ యాసిడ్స్

ఒమేగా -3 కొవ్వు ఆమ్లాలు రెటీనా పనితీరుకు ముఖ్యమైనవి. ప్రీ-టర్మ్, పూర్తి-కాల శిశువులపై చేసిన అధ్యయనాలు సరైన దృశ్య అభివృద్ధికి ఆహారంలో తగినంత ఒమేగా -3 కొవ్వు ఆమ్లాలను పొందడం అవసరం అని తేలింది. దీని కోసం సాల్మన్, ట్యూనా, ఇతర నీటి చేపలను తీసుకోవాలి.

5. జింక్

మెలనిన్ అనే రక్షిత వర్ణద్రవ్యాన్ని ఉత్పత్తి చేయడానికి కాలేయం నుంచి రెటీనాకు విటమిన్ ఎను రవాణా చేయడంలో జింక్ ముఖ్యమైన పాత్ర పోషిస్తుంది. అస్పష్టమైన దృష్టి, రేచీకటి, కంటిశుక్లం నివారించడానికి గింజలు, విత్తనాలు రెడ్ మీట్ తీసుకోవచ్చు.