Heart Failure: గుండె ఆగిపోవడానికి ముందు కనిపించే 7 ముఖ్య లక్షణాలివే.. వీటిని అస్సలు విస్మరించొద్దు

Heart Failure: గుండె ఆగిపోవడం అనేది అకస్మాత్తుగా జరిగేది కాదు. ఇది నెమ్మదిగా పెరిగే పరిస్థితి, ఇది మీ జీవనశైలి, రోగాలు, వైద్య చరిత్ర పై ఆధారపడి ఉంటుంది. అధిక రక్తపోటు, మధుమేహం, ఊబకాయం లేదా కుటుంబంలో గుండె సమస్యల చరిత్ర వంటి ప్రమాద కారకాలు ఉంటే, సమయానికి పరీక్షలు చేయించుకోవాలి. డాక్టర్ సలహా ప్రకారం జీవనశైలిలో మార్పులు చేసుకోవాలి.

గుండె ఆగిపోవడం అనేది ఒక తీవ్రమైన పరిస్థితి. దీనిలో గుండె శరీరానికి అవసరమైనంత రక్తాన్ని పంప్ చేయలేదు. ఈ సమస్య నెమ్మదిగా కూడా పెరగవచ్చు, లేదా అకస్మాత్తుగా కూడా రావచ్చు. దురదృష్టవశాత్తు.. చాలా మంది దీని ప్రారంభ లక్షణాలను చిన్నవిగా భావించి విస్మరిస్తారు. కానీ, శరీరం ముందే చాలా సంకేతాలు ఇస్తుంది. వాటిని సకాలంలో గుర్తించడం చాలా అవసరం.

గుండె ఆగిపోవడానికి ముందు కనిపించే 7 ముఖ్య లక్షణాలు

అపోలో హాస్పిటల్స్‌లోని కార్డియాలజీ విభాగం డాక్టర్ వరుణ్ బన్సల్ గుండె ఆగిపోవడానికి ముందు కనిపించే కొన్ని లక్షణాలను వివరించారు.

1. శ్వాస ఆడకపోవడం : నడిచేటప్పుడు, మెట్లు ఎక్కేటప్పుడు లేదా పడుకున్నప్పుడు కూడా శ్వాస తీసుకోవడంలో ఇబ్బంది ఉంటుంది. ఇది గుండె బలహీనపడుతోందనడానికి ముఖ్య సంకేతం.

2. నిరంతర అలసట : గుండె సరిగ్గా రక్తాన్ని పంప్ చేయనప్పుడు, శరీర భాగాలకు తగినంత ఆక్సిజన్, పోషకాలు అందవు. దీనివల్ల కండరాలలో శక్తి తగ్గిపోయి నిరంతరం అలసట, బలహీనత కలుగుతాయి.

3. కాళ్లు, చీలమండలు, పొట్టలో వాపు : గుండె సరిగ్గా రక్తాన్ని పంప్ చేయలేనప్పుడు, శరీరంలో ద్రవాలు పేరుకుపోతాయి. ఇది కాళ్లు, చీలమండలు, పొట్టలో వాపుకు దారితీస్తుంది.

4. వేగంగా గుండె కొట్టుకోవడం: కొన్నిసార్లు గుండె వేగంగా కొట్టుకుంటున్నట్లు అనిపిస్తుంది. ఇది గుండె అరిథ్మియాకు సంకేతం కావచ్చు, ఇది గుండె ఆగిపోవడానికి దారితీస్తుంది.

5.ఆకలి లేకపోవడం, వాంతి వచ్చినట్లు అనిపించడం : జీర్ణవ్యవస్థలో లోపాలు తలెత్తుతాయి. దీనివల్ల కడుపు నిండుగా ఉన్నట్లు అనిపించి, ఆకలి తగ్గిపోతుంది. వికారం లేదా వాంతి వచ్చినట్లు కూడా అనిపించవచ్చు.

6.కళ్ళు తిరగడం, మతిమరుపు : ఈ లక్షణం వృద్ధులలో ఎక్కువగా కనిపిస్తుంది. మెదడుకు తగినంత రక్తం అందకపోవడం వల్ల కళ్ళు తిరగడం, ఏకాగ్రత తగ్గడం మరియు మతిమరుపు వంటివి వస్తాయి.

7.ఛాతీ నొప్పి : గుండె ఆగిపోవడంతో పాటు గుండెపోటు వచ్చే పరిస్థితి కూడా ఉన్నప్పుడు ఛాతీలో నొప్పి లేదా ఒత్తిడి కలుగుతుంది. ఇలాంటి సందర్భంలో, తక్షణమే వైద్య సహాయం తీసుకోవడం చాలా ముఖ్యం.

గుండె ఆగిపోవడం లక్షణాలు ప్రారంభంలో లైట్ గా ఉండవచ్చు, కానీ సమయం గడిచే కొద్దీ అవి తీవ్రమవుతాయి. ఈ ఏడు లక్షణాలలో ఏదైనా నిరంతరం మీకు అనిపిస్తుంటే, వాటిని విస్మరించవద్దు. వెంటనే గుండె వైద్యుడిని సంప్రదించాలి.