ఏపీ, తెలంగాణకు ఐఎండీ బిగ్ అలర్ట్: ఇవాళ, రేపు భారీ వర్షాలు.. ఉరుములు, మెరుపులతో హెచ్చరికలు!

ఏపీ, తెలంగాణ రాష్ట్రాల ప్రజలకు ఐఎండీ (IMD) భారీ వర్ష హెచ్చరికలు జారీ చేసింది. ఈశాన్య బంగాళాఖాతంలో కొనసాగుతున్న ఉపరితల ద్రోణి ప్రభావంతో జూలై 17, 18 తేదీల్లో భారీ వర్షాలు కురిసే అవకాశం ఉందని వాతావరణ శాఖ తెలిపింది. గంటకు 30 నుండి 40 కిలోమీటర్ల వేగంతో ఈదురుగాలులు వీస్తాయని హెచ్చరించింది.

తెలంగాణలో పలు జిల్లాలకు ఎల్లో అలర్ట్ (Yellow Alert) ప్రకటించగా, కొన్ని ప్రాంతాల్లో ఉరుములు, మెరుపులతో కూడిన వర్షాలు కురిసే అవకాశం ఉందని హైదరాబాద్ వాతావరణ కేంద్రం స్పష్టం చేసింది.

ఈ జిల్లాల్లో భారీ వర్ష సూచన:

నల్గొండ, సూర్యాపేట, నాగర్‌కర్నూల్, వనపర్తి జిల్లాల్లో ఇవాళ భారీ వర్షాలు కురవొచ్చని సూచన ఉంది. అలాగే, ఆదిలాబాద్, భూపాలపల్లి, ములుగు, ఖమ్మం, వరంగల్, హన్మకొండ, మెదక్, రంగారెడ్డి, హైదరాబాద్, మేడ్చల్, సంగారెడ్డి, కామారెడ్డి తదితర జిల్లాల్లో తేలికపాటి నుంచి మోస్తారు వర్షాలు పడొచ్చు.

జూలై 18న, మహబూబాబాద్, వరంగల్, హన్మకొండ, జనగాం, సిద్ధిపేట జిల్లాల్లో పలుచోట్ల భారీ వర్షాలు కురిసే అవకాశం ఉంది. వర్షాల సమయంలో బలమైన గాలులు, ఉరుములు, మెరుపులు ఉంటాయని అధికారిక హెచ్చరికలలో పేర్కొన్నారు.

రాయలసీమ, ఉత్తరాంధ్ర, కోస్తా జిల్లాల్లో వర్ష సూచన:

ఏపీ విపత్తుల నిర్వహణ సంస్థ ప్రకారం, రాయలసీమలో (తిరుపతి మినహా) మోస్తారు నుంచి భారీ వర్షాలు కురవొచ్చు. ఉత్తరాంధ్రలో తేలికపాటి నుంచి మోస్తారు వర్షాలు కురిసే అవకాశం ఉంది. కోస్తా జిల్లాల్లో కొన్నిచోట్ల తేలికపాటి వర్షాలు నమోదయ్యే అవకాశముందని అంచనా.