Indians in America: భారతీయ విద్యార్థుల మెడ ట్రంప్‌ కత్తి.. ఇంత దారుణం ఎక్కడ జరగదు!

Indians in America

అమెరికాలో చదువుతో భవిష్యత్తు నిర్మించాలన్న కలలతో వెళ్లిన భారతీయ విద్యార్థులకు అక్కడ ప్రస్తుతం వాతావరణం మరింత ప్రతికూలంగా మారుతోంది. కోర్టులు పూర్తిగా నిర్దోషులుగా తేల్చినా, చిన్నచిన్న కారణాల మీద ఆధారపడి వారి స్టూడెంట్ వీసాలను రద్దు చేస్తున్న ఘటనలు పెరుగుతున్నాయి. మరింత ఆందోళనకరంగా మారిన విషయం ఏంటంటే... వీసా రద్దయిన వెంటనే SEVIS రికార్డు కూడా టెర్మినేట్ అవుతోంది. దాంతో ఆ విద్యార్థి అమెరికాలో ఉనికి చట్టబద్ధంగా నిలవడం అసాధ్యమవుతోంది.

ఇటీవల ఓ విద్యార్థి తన స్నేహితుడి మోసానికి బలై, దానిని అధికారులకు తెలియజేసి, వీడియో ఆధారాలతో కోర్టులో నిర్దోషిగా తేలాడు. అయినా అతడి వీసా రద్దైంది. అతను ఇప్పుడు స్వచ్ఛందంగా వెనక్కి తిరిగిపోవాల్సిన పరిస్థితిలో ఉన్నాడు. ఇలాంటి కేసులు వందల్లో ఎదురవుతున్నాయని, టెక్సాస్‌లోని ప్రముఖ ఇమ్మిగ్రేషన్ లాయర్ చంద్ పరవతనేని తెలిపారు. ఇప్పటికే ఆయన 30కిపైగా ఇటువంటి కేసులు హ్యాండిల్ చేస్తున్నట్టు వెల్లడించారు.

ఈ చర్యలు ఎక్కువగా ట్రంప్ పాలనలో ఏర్పడిన కఠిన వలస విధానాలపై ఆధారపడి ఉన్నట్లు తెలుస్తోంది. ఇక ఇటీవల తమ వీసాలు రద్దయ్యాయన్న మెయిల్‌లను పొందిన భారతీయ విద్యార్థుల సంఖ్య పెరుగుతోంది. కొంతమంది వీసాలు రద్దవడానికి కారణాలు చిన్నచిన్న వాహన నియమాల ఉల్లంఘనలే. అలాంటి సంఘటనల్లో కోర్టులు సైతం వారిని నిర్దోషులుగా తేల్చినా.. వీసా వ్యవస్థ మాత్రం దానిని పరిగణించకపోవడం ఇప్పుడు ప్రధాన సమస్యగా మారింది.

ఇది ఇక్కడితో ఆగలేదు. కొన్ని సందర్భాల్లో, ఏఐ ఆధారంగా విద్యార్థుల క్రియాశీలతను ట్రాక్ చేస్తూ, ఫలితంగా SEVIS రికార్డులు తొలగించడాన్ని అధికారులు చేపడుతున్నారు. దీని ప్రభావంతో వీసా పూర్తిగా చెల్లదు. ఆ తరువాత విద్యార్థులకు రెండు మార్గాలే ఉన్నాయి. 15 రోజుల్లో అమెరికా వదిలి వెళ్ళడం లేదా చట్టబద్ధంగా తమ స్టేటస్‌ను తిరిగి పొందడం. లేకపోతే భవిష్యత్తులో వీసా పునరుద్ధరణ కూడా కష్టమే.

ఇక ట్రాఫిక్ తప్పిదాలు, డ్రైవింగ్ అనుమతుల లోపాలు, షాప్లిఫ్టింగ్, డొమెస్టిక్ వివాదాలు, DUI ఆరోపణలు.. ఇవన్నీ కూడా ఇప్పటివరకు విద్యార్థుల స్టేటస్‌కు పెను ముప్పుగా మారుతున్నాయి. కోర్టులు ఎంతమాత్రం సహాయం చేసినా, వీసా వ్యవస్థ మాత్రం ఆ సహకారాన్ని పరిగణనలోకి తీసుకోవడం లేదని తెలుస్తోంది.

ఇలాంటిపరిస్థితుల్లో ఉన్న విద్యార్థులకు ఏం చేయాలి? ఇమ్మిగ్రేషన్ నిపుణుల సూచనల ప్రకారం, తక్షణంగా చట్టబద్ధ చర్యలు తీసుకోవాలి. తమ వీసా రద్దును వ్యతిరేకిస్తూ లీగల్ ఛాలెంజ్ చేయవచ్చు. స్వచ్ఛందంగా వెళ్తే, భవిష్యత్‌లో అమెరికాలో అడుగుపెట్టడం మరింత కష్టమవుతుంది. అందుకే, లీగల్ మార్గమే తొలి ఎంపికగా భావించాలి.