RBI : రాఖీ పండుగకు ముందే ఆర్‌బీఐ శుభవార్త ? మళ్లీ తగ్గనున్న వడ్డీ రేట్లు?

RBI : రాఖీపండగ రాబోతోంది. మరోవైపు ఆగస్టులో ఆర్‌బీఐ మానిటరీ పాలసీ మీటింగ్ జరగబోతోంది. ఈ నేపథ్యంలో అందరి దృష్టి ఆర్‌బీఐ తీసుకోబోయే నిర్ణయాలపైనే ఉంది. ముఖ్యంగా, సామాన్యులు, హోమ్ లోన్లు, కార్ లోన్లు తీసుకున్నవారు ఆసక్తిగా ఎదురుచూస్తున్నారు. ఎందుకంటే, మరోసారి వడ్డీ రేట్లలో కోత పడబోతోందని ఎస్‌బీఐ లాంటి బ్యాంకులు అంచనా వేస్తున్నాయి. ఒకవేళ ఆర్‌బీఐ నిజంగా వడ్డీ రేట్లు తగ్గిస్తే, ఈ పండుగ సీజన్‌కు ముందే ప్రజలకు ఇదొక పెద్ద బహుమతి అవుతుంది. ఎస్‌బీఐ నివేదిక ప్రకారం.. ఆర్‌బీఐ ఆగస్టు 4 నుండి 6 వరకు జరగబోయే మానిటరీ పాలసీ కమిటీ (ఎంపీసీ) సమావేశంలో రెపో రేటును 25 బేసిస్ పాయింట్లు తగ్గించే అవకాశం ఉంది.

గతంలో, ఫిబ్రవరి 2025 నుండి ఇప్పటివరకు ఆర్‌బీఐ నాలుగు సార్లు కలిపి 1 శాతం వరకు రెపో రేటును తగ్గించింది. దీనివల్ల బ్యాంకులు తమ రుణాల వడ్డీ రేట్లను తగ్గించాయి, తద్వారా సామాన్య ప్రజలకు తక్కువ వడ్డీకే రుణాలు లభించాయి. ఇప్పుడు మళ్లీ వడ్డీ రేట్లు తగ్గితే, అది కస్టమర్లకు మరింత ఊరటనిస్తుంది. ఎస్‌బీఐ నివేదికలో చెప్పిన ప్రకారం, ఆగస్టులో రెపో రేటు తగ్గితే అది పండుగకు ముందు వచ్చే బహుమతి లాంటిదే. ముఖ్యంగా, 2025-26 ఆర్థిక సంవత్సరంలో పండుగల సీజన్ ప్రారంభం కాబోతున్న తరుణంలో ఈ నిర్ణయం రుణాల డిమాండ్‌ను పెంచుతుంది.

గతంలో కూడా ఇలాంటి ఉదాహరణలు ఉన్నాయని ఎస్‌బీఐ నివేదిక చెబుతోంది. 2017 ఆగస్టులో ఆర్‌బీఐ రెపో రేటును 25 బేసిస్ పాయింట్లు తగ్గించినప్పుడు, దీపావళి పండుగ వచ్చేసరికి మొత్తం 1,956 బిలియన్ రూపాయల అదనపు రుణాలు పెరిగాయి. వీటిలో దాదాపు 30 శాతం పర్సనల్ లోన్స్ ఉండటం విశేషం. దీనివల్ల పండుగ సమయంలో ప్రజల ఖర్చు పెరిగింది.. ఆర్థిక వ్యవస్థకు ఊపు వచ్చింది. గత కొన్ని నెలలుగా ద్రవ్యోల్బణం ఆర్‌బీఐ నిర్ణయించిన లక్ష్యాల పరిధిలోనే ఉంది. అంటే, ధరలు బాగా అదుపులో ఉన్నాయి. ఈ పరిస్థితుల్లో కూడా ఆర్‌బీఐ కఠినమైన ద్రవ్య విధానాన్ని కొనసాగించడం వల్ల ఉత్పత్తికి నష్టం జరగవచ్చు. దానివల్ల ఆర్థిక వృద్ధి మందగించే ప్రమాదం ఉందని నిపుణులు హెచ్చరిస్తున్నారు.

ఆర్‌బీఐ వడ్డీ రేట్ల తగ్గింపును వాయిదా వేస్తే, అది ఆర్థిక వ్యవస్థకు పెద్ద నష్టం కలిగించవచ్చు. ద్రవ్యోల్బణం మరింత తగ్గడానికి లేదా ఆర్థిక వృద్ధి మరింత మందగించడానికి ఆర్‌బీఐ ఎదురుచూస్తే, అది ఆర్థిక వ్యవస్థకు మంచిది కాదని నివేదిక స్పష్టం చేసింది. వడ్డీ రేట్ల తగ్గింపు వల్ల గృహ రుణాలు, కార్ లోన్లు వంటివి చౌకగా లభిస్తాయి. దీనితో పాటు, వ్యాపారాలకు కూడా తక్కువ వడ్డీకి రుణాలు లభిస్తాయి. ఇది పెట్టుబడులను ప్రోత్సహిస్తుంది, కొత్త వ్యాపారాలు ప్రారంభించడానికి లేదా ఉన్న వ్యాపారాలను విస్తరించడానికి సహాయపడుతుంది. మొత్తానికి, ఆర్‌బీఐ రెపో రేటును తగ్గిస్తే అది కేవలం రుణగ్రహీతలకు మాత్రమే కాకుండా, మొత్తం ఆర్థిక వ్యవస్థకు కూడా మేలు చేస్తుంది. ద్రవ్యోల్బణాన్ని అదుపులో ఉంచుతూనే, జీడీపీ వృద్ధికి సహాయపడటం దీని ముఖ్య ఉద్దేశ్యం.