Tesla In India: భారత్ లోకి టెస్లా ఎంట్రీ..!

Tesla In India: ఎన్నాళ్లుగానో ఎదురుచూస్తున్నటెక్ దిగ్గజం టెస్లా కంపెనీ భారత్ లోకి ఎట్టకేలకు అడుగుపెట్టింది. ఇక మనదేశంలో ఖరీదైన టెస్లా కారులు రయ్ రయ్ మని తిరగబోతున్నాయి. టెస్లా కంపెనీ భారత్ లో నియామకాల కోసం లింక్డిన్‌లో ఓ ప్రకటన చేసింది. టెస్లా కంపెనీ భారత మార్కెట్లోకి అడుగుపెట్టేందుకు ఎంతోకాలంగా ప్రయత్నాలు చేస్తోంది. కానీ, సుంకాలు, ఇతరత్రా కారణాలతో ఆ ప్రణాళికలు ఇప్పటివరకూ కార్యరూపం దాల్చలేదు. ఇప్పుడు ఇందుకు సంబంధించి కీలక ముందడుగు పడింది. తాజాగా ఈ కంపెనీ భారత్‌లో ఎంట్రీపై స్పష్టమైన సంకేతాలిచ్చింది. భారత ప్రధాని నరేంద్ర మోదీతో టెస్లా అధినేత ఎలాన్‌ మస్క్‌ తాజాగా అమెరికాలో భేటీ అయిన కొన్ని రోజులకే ఈ పరిణామాలు చోటుచేసుకోవడం ప్రాధాన్యం సంతరించుకుంది.

టెస్లా కంపెనీ.. మనదేశంలో కస్టమర్‌ రిలేటెడ్‌, బ్యాక్‌ఎండ్‌ జాబ్‌ సహా 13 ఉద్యోగాల భర్తీకి అభ్యర్థులు కావాలంటూ తమ లింక్డిన్‌ పేజీలో ఓ ప్రకటన చేసింది. ఇందులో సర్వీస్‌ టెక్నీషియన్‌, అడ్వైజరీ సహా కనీసం ఐదు పొజిషన్లకు ఉద్యోగులను ముంబయి, దిల్లీ రెండు చోట్లా నియమించుకోనున్నట్లు కంపెనీ తెలిపింది. ఇక, కస్టమర్‌ ఎంగేజ్‌మెంట్‌ మేనేజర్‌, డెలివరీ ఆపరేషన్స్‌ స్పెషలిస్ట్‌ వంటి ఉద్యోగులను కేవలం ముంబయి కేంద్రంగా తీసుకోనున్నట్లు తెలిపింది. టారిఫ్‌ల కోత దిశగా భారత్, అమెరికా. టెస్లా భారత మార్కెట్లోకి ప్రవేశించేందుకు 2021 నుంచి ప్రయత్నాలు జరుగుతున్నాయి. ఇందుకోసం ఈవీలపై దిగుమతి సుంకాలను గణనీయంగా తగ్గించాలని మస్క్‌ కంపెనీ డిమాండ్‌ చేసింది. ఇందుకు కేంద్రప్రభుత్వం కొన్ని షరతులు విధించింది. దేశీయంగా తయారీ ప్రారంభించడంతో పాటు ప్రాంతీయంగానే విడిభాగాలు కొనుగోలు చేయాలన్న కండీషన్‌ పెట్టింది. ఇందుకు మస్క్‌ అభ్యంతరం వ్యక్తంచేస్తున్నారు. దీంతో టెస్లా ఎంట్రీ ఆలస్యమవుతూ వస్తోంది.

టెస్లా విజ్ఞప్తుల మేరకు కేంద్రం కొంత సుంకాలను తగ్గించింది. ఈ క్రమంలోనే ఇటీవల 40వేల డాలర్ల అంటే భారత కరెన్సీలో దాదాపు రూ.34లక్షలు కంటే ఎక్కువ ఖరీదైన హైఎండ్‌ కార్లపై బేసిక్‌ కస్టమ్స్‌ సుంకాన్ని 110శాతం నుంచి 70శాతానికి తగ్గించింది. తాజా పరిణామాలతో త్వరలోనే మన రోడ్లపై టెస్లా కార్లు చక్కర్లు కొట్టే అవకాశాలున్నట్లు ఆటో రంగ నిపుణులు అభిప్రాయపడుతున్నారు.