Rules Change from 1st October: అక్టోబర్ 1 లోపు ఇలా చేయండి.. లేకపోతే ఆ అకౌంట్లు క్లోజ్ అయ్యే ఛాన్స్?

Rules Change from 1st October: మీరు PPF, సుకన్య సమృద్ధి యోజనలో పెట్టుబడి పెట్టినట్లయితే, మీ కోసం ఒక ముఖ్యమైన వార్త వచ్చింది. ఈ పథకాలకు సంబంధించిన నిబంధనలను ప్రభుత్వం మార్చింది. మీరు ఈ ఇన్వెస్ట్‌మెంట్ స్కీమ్‌లలో ఇన్వెస్ట్ చేసి ఉంటే, మీరు కొన్ని ముఖ్యమైన పనులను అక్టోబర్ 1లోపు పూర్తి చేయాల్సి ఉంటుంది. లేకుంటే మీ ఖాతా ఇన్‌యాక్టివ్‌గా మారవచ్చు.

PPF:- పబ్లిక్ ప్రావిడెంట్ ఫండ్ (PPF) క్రమబద్ధీకరణకు సంబంధించి ఆర్థిక మంత్రిత్వ శాఖ ఆర్థిక వ్యవహారాల విభాగం గత నెలలో మార్గదర్శకాలను జారీ చేసింది. ఈ మార్గదర్శకాలు అక్టోబర్ 1, 2024 నుంచి అమలులోకి రానున్నాయి. వచ్చే నెల ప్రారంభం నుంచి మైనర్‌ల పేరిట తెరిచిన పీపీఎఫ్ ఖాతాలపై వారికి 18 ఏళ్లు వచ్చే వరకు పొదుపు ఖాతా వడ్డీ అందుబాటులో ఉంటుంది. అదే సమయంలో, మీకు ఒకటి కంటే ఎక్కువ PPF ఖాతాలు ఉంటే, అప్పుడు ఒక ఖాతాకు మాత్రమే పథకం రేటు ప్రకారం వడ్డీ లభిస్తుంది. మిగిలిన, ఇతర PPF ఖాతాలలో జమ చేసిన మొత్తానికి ఎలాంటి వడ్డీ చెల్లించరు.

సుకన్య సమృద్ధి యోజన: కుమార్తెల కోసం ప్రారంభించిన సుకన్య సమృద్ధి యోజనకు కూడా కొత్త నిబంధనలు వర్తిస్తాయి. అక్టోబరు 1 నుంచి ఇందుకు సంబంధించిన రూల్స్‌లో మార్పు రానుంది. కొత్త నిబంధన ప్రకారం, తాతలు లేదా మరెవరైనా తెరిచిన ఖాతాలను చట్టపరమైన సంరక్షకులు లేదా తల్లిదండ్రుల పేరు మీద బదిలీ చేయాలి. పారదర్శకత, ఖాతాల నిర్వహణ సక్రమంగా నిర్వహించడం ప్రభుత్వ లక్ష్యం.