Pahalgam Attack: పహల్గామ్ బాధితులకు ఎల్‌ఐసీ భారీ ఊరట! క్లెయిమ్‌ల విషయంలో కీలక ప్రకటన!

Pahalgam Attack: భారతీయ జీవిత బీమా సంస్థ (ఎల్‌ఐసీ) పహల్గామ్ ఉగ్రదాడి బాధితుల కోసం గురువారం నాడు క్లెయిమ్ పరిష్కార ప్రక్రియను సింపుల్ చేసింది. కాశ్మీర్‌లోని పహల్గామ్‌లో మంగళవారం జరిగిన దారుణమైన ఉగ్రదాడిలో ఎక్కువ మంది పర్యాటకులే అయిన 26 మంది మరణించారు. ఉగ్రదాడిలో ప్రజల మృతికి ఎల్‌ఐసీ సంతాపం తెలిపింది. బాధిత ప్రజలకు సహాయం చేయడానికి తాము కట్టుబడి ఉన్నామని, ఆర్థిక సహాయం అందించడానికి క్లెయిమ్‌ల పరిష్కారాన్ని వేగవంతం చేస్తామని ఒక ప్రకటనలో తెలిపింది. ఎల్‌ఐసీ చీఫ్ ఎగ్జిక్యూటివ్ ఆఫీసర్ (సీఈఓ), మేనేజింగ్ డైరెక్టర్ (ఎండీ) సిద్ధార్థ మొహంతి మాట్లాడుతూ.. ఎల్‌ఐసీ పాలసీదారుల కష్టాలను తగ్గించడానికి బీమా సంస్థ అనేక రాయితీలను ప్రకటించిందని తెలిపారు.

మరణ ధృవీకరణ పత్రానికి బదులుగా, ఉగ్రదాడిలో పాలసీదారు మరణించినట్లు లేదా కేంద్ర/రాష్ట్ర ప్రభుత్వం చెల్లించిన ఏదైనా నష్టపరిహారం ప్రభుత్వ రికార్డులలో ఉన్న ఏదైనా సాక్ష్యాన్ని మరణ ధృవీకరణగా అంగీకరిస్తామని ఆయన చెప్పారు. క్లెయిమ్ దారులను చేరుకోవడానికి, బాధిత కుటుంబాల క్లెయిమ్‌లను త్వరగా పరిష్కరించడానికి అన్ని ప్రయత్నాలు జరుగుతాయని ప్రకటనలో పేర్కొన్నారు. ఏదైనా సహాయం కోసం క్లెయిమ్ దారులు సమీపంలోని ఎల్‌ఐసీ శాఖ/డివిజన్/కస్టమర్ జోన్‌లను సంప్రదించవచ్చు లేదా 022-68276827కు కాల్ చేయవచ్చని ఎల్‌ఐసీ తెలిపింది.

పహల్గామ్‌లో జరిగిన ఉగ్రదాడిపై గురువారం సర్వపక్ష సమావేశం జరిగింది. ఈ సమావేశానికి రక్షణ మంత్రి రాజ్‌నాథ్ సింగ్ అధ్యక్షత వహించగా, కేంద్ర హోం మంత్రి అమిత్ షా రాజకీయ పార్టీలకు పరిస్థితిని వివరించారు. ఈ రోజు జరిగిన సమావేశంలో హోం మంత్రి అమిత్ షా అక్కడ తప్పిదం జరిగిందని అంగీకరించారు. చాలా రాజకీయ పార్టీలు నిఘా వైఫల్యం, అక్కడ సరైన భద్రతా ఏర్పాట్లు లేకపోవడం గురించి ప్రశ్నించాయి. రాహుల్ గాంధీ కూడా ఘటన జరిగిన ఎగువ ప్రాంతంలో భద్రతా సిబ్బంది ఎందుకు లేరని అడిగారు. దీనిపై ప్రభుత్వం స్పందిస్తూ.. సాధారణంగా ఈ మార్గాన్ని జూన్ నెలలో అమర్‌నాథ్ యాత్ర ప్రారంభమైనప్పుడు తెరుస్తారని, ఎందుకంటే అమర్‌నాథ్ యాత్రికులు ఈ ప్రదేశంలో విశ్రాంతి తీసుకుంటారని తెలిపింది.