బ్యాంకుల కంటే ఎక్కువ వడ్డీ: ఈ స్కీమ్ గురించి మీకు తెలుసా?

మహిళలకు ఆర్ధిక స్వేచ్ఛ కల్పించేందుకు కేంద్ర ప్రభుత్వం కొత్త కొత్త పథకాలకు శ్రీకారం చుట్టింది. ఇందులో భాగంగానే మహిళా సమ్మాన్ సేవింగ్స్ పథకం మహిళల కోసం కేంద్ర ప్రభుత్వం ప్రారంభించింది. 2023 లో ఈ పథకాన్ని కేంద్రం ప్రారంభించింది. ఇందులో చేరడానికి 2025 మార్చి 31 లాస్ట్ డేట్.

బ్యాంకులో ఇచ్చే వడ్డీరేట్ల కంటే ఈ పథకంలో పెట్టుబడి పెడితే ఎక్కువ వడ్డీని చెల్లిస్తారు. ఈ పథకం కింద కనిష్టంగా వెయ్యి రూపాయాలు, గరిష్టంగా రెండు లక్షలు సేవింగ్స్ చేసుకోవచ్చు. ఏడాదికి 7.50 శాతం వడ్డీ చెల్లిస్తారు. ప్రతి మూడు నెలలకు ఒకసారి వడ్డీ లెక్కిస్తారు. రెండేళ్లకు ఈ డబ్బును తీసుకోవచ్చు. మెచ్యూరిటీ సమయంలో అసలు, వడ్డీ కలిపి తీసుకోవచ్చు. మైనర్ల పేరుతో ఖాతా ఓపెన్ చేయాలనుకుంటే గార్డియన్ ఆ ఖాతాను తెరవచ్చు.

ఒకరికి ఒకటి కంటే ఎక్కువ ఖాతాలు కూడా ఓపెన్ చేసుకోవచ్చు. అయితే ఒక ఖాతాకు మరో ఖాతాకు మధ్య మూడు నెలల గ్యాప్ ఉండాలి. ఖాతాలోని డబ్బును ఏడాది తర్వాత 40 శాతం కూడా విత్ డ్రా చేసుకోవచ్చు. ఈ స్కీమ్ కింద పొదువు చేస్తే ఎలాంటి రిస్క్ ఉండదు. దీని కింద పొందిన వడ్డీ నుంచి టీడీఎస్ మినహాయింపు ఉండదు.

జాతీయ బ్యాంకులతో పాటు పోస్టాఫీసుల నుంచి కూడా ఈ ఖాతాను ఓపెన్ చేయవచ్చు. ధరకాస్తు ఫారంతో పాటు ఆధార్ తో పాటు అవసరమైన సర్టిఫికెట్లతో ఈ ఖాతాను ఓపెన్ చేయవచ్చు. ఈ ఖాతాను ఓపెన్ చేసిన వారు మరణిస్తే అసలు వడ్డీని వెంటనే చెల్లిస్తారు. ఆరు నెలల తర్వాత ఈ ఖాతాను క్లోజ్ చేసినా 5.5 శాతం వడ్డీ చెల్లిస్తారు.బ్యాంక్ ఆఫ్ ఇండియా, బ్యాంక్ ఆఫ్ బరోడా, కెనరా బ్యాంక్, యూనియన్ బ్యాంక్ ఆఫ్ ఇండియా, పంజాబ్ నేషనల్ బ్యాంక్, సెంట్రల్ బ్యాంక్ ఆఫ్ ఇండియా బ్యాంకుల్లో ఈ స్కీమ్ ధరఖాస్తు ఫారాలు లభిస్తాయి.