Income Tax Slab: బడ్జెట్‌లో ఆదాయపు పన్నుకు సంబంధించి కీలక ప్రకటన.. 15 లక్షల వరకు ఆదాయం ఉన్నవారికి ఉపశమనం..!

Income Tax Slab: ఆదాయపు పన్నులో ఉపశమనం కోసం దేశంలోని వేతన తరగతి నుండి ప్రతి సంవత్సరం డిమాండ్ ఉంటూనే ఉంది. గత ఏడాది కూడా ప్రజలు పన్ను శ్లాబులను మార్చాలని ఆర్థిక మంత్రిని కోరారు. అయితే ఈసారి పన్ను నిబంధనలకు సంబంధించి ప్రభుత్వం నుంచి కీలక ప్రకటన వెలువడే అవకాశం ఉంది.మధ్యతరగతి ప్రజలకు పెద్ద పన్ను మినహాయింపు ఇవ్వాలని ప్రభుత్వం పరిశీలిస్తోందని రాయిటర్స్ నివేదిక పేర్కొంది. వార్షికాదాయం రూ.15 లక్షల వరకు ఉన్న వారికి ఈ ఉపశమనం కల్పించే యోచనలో ప్రభుత్వం ఉన్నట్లు తెలుస్తోంది.

ఫిబ్రవరి 1న బడ్జెట్‌

ఫిబ్రవరి 1, 2025న సమర్పించే బడ్జెట్‌లో ప్రభుత్వం పన్ను చెల్లింపుదారులకు ఉపశమనం ప్రకటించవచ్చని రాయిటర్స్ నివేదిక పేర్కొంది. ఆదాయపు పన్నుపై భారీ సడలింపు నిర్ణయం.. ఆర్థిక వ్యవస్థను పెంచడానికి, మరింత ఖర్చు చేయడానికి ప్రజలను ప్రోత్సహించడానికి ఒక ప్రణాళిక. ప్రభుత్వం ఈ చర్య తీసుకుంటే భవిష్యత్తులో ద్రవ్యోల్బణాన్ని ఎదుర్కోవడం సులభం అవుతుంది.

పన్నులపై చాలా కాలంగా ఫిర్యాదులు

వాస్తవానికి, నగరాల్లో నివసించే ప్రజలు చాలా కాలంగా పెరుగుతున్న ఖర్చులు, అధిక పన్నుల గురించి ఫిర్యాదు చేస్తున్నారు. అందుకే ఈ మార్పును ప్రభుత్వం చేయాలని భావిస్తున్నారు. 2020 సంవత్సరంలో అమలులోకి వచ్చిన కొత్త పన్ను విధానం ప్రకారం, ఒక వ్యక్తి వార్షిక ఆదాయం రూ. 3 నుండి 15 లక్షల మధ్య ఉంటే, అతను 5 శాతం నుండి 20 శాతం వరకు పన్ను చెల్లించాలి. వార్షిక ఆదాయం రూ. 15 లక్షల కంటే ఎక్కువ ఉంటే ఆదాయపు పన్ను 30 శాతానికి పెరుగుతుంది.

పన్ను చెల్లింపుదారులకు రెండు రకాల ఆప్షన్లు

ప్రస్తుతం దేశంలో పన్ను చెల్లింపుదారులకు రెండు రకాల ఆప్షన్లు ఉన్నాయి. మీరు మీ ఆదాయాన్ని బట్టి వీటిలో దేనినైనా ఎంచుకోవచ్చు. ముందుగా, పాత పన్ను విధానం, ఇందులో మీరు ఇంటి అద్దె, బీమా మొదలైన కొన్ని ఖర్చులకు మినహాయింపు పొందవచ్చు. రెండవ నియమం కొత్త పన్ను విధానం. దీని కింద, పన్ను రేట్లు తక్కువగా ఉన్నాయి.. కానీ చాలా మినహాయింపులు రద్దు చేయబడ్డాయి.

ఆర్థిక శాఖ నుంచి లేని స్పందన

ఆదాయపు పన్నులో మినహాయింపు ఇవ్వాలని ప్రభుత్వం నిర్ణయించినట్లయితే, 2020లో అమల్లోకి వచ్చిన కొత్త పన్ను విధానాన్ని చాలా మంది ప్రజలు ఎంచుకోవాలని భావిస్తున్నారు. ప్రధానమంత్రి నరేంద్రమోదీ నేతృత్వంలోని ప్రభుత్వం ఎంతమేరకు పన్ను మినహాయింపు ఇవ్వాలనేది ఇంకా నిర్ణయించలేదని నివేదికల్లో స్పష్టమైంది. ప్రస్తుతానికి, ఆర్థిక మంత్రిత్వ శాఖ లేదా ఆర్థిక మంత్రి నిర్మలా సీతారామన్ దీనిపై ఎటువంటి కామెంట్స్ చేయలేదు.

దేశ ఆర్థిక వ్యవస్థపై పెరుగుతున్న ఆందోళనలు

ఆర్థిక వ్యవస్థపై ఆందోళనలు పెరుగుతున్నందున దేశంలో పన్ను వ్యవస్థలో మార్పులను పరిశీలిస్తున్నారు. 2024 సంవత్సరంలో జూలై, సెప్టెంబర్ మధ్య దేశ వృద్ధి రేటు గత ఏడు త్రైమాసికాల కంటే తక్కువగా ఉంది. దీంతోపాటు ఆహార పదార్థాల ధరలు కూడా పెరుగుతున్నాయి. దీంతో ప్రజల ఖర్చులు నానాటికీ పెరిగిపోతున్నాయి. దీని ప్రభావం కార్లు, గృహోపకరణాలు, వ్యక్తిగత వినియోగ వస్తువుల విక్రయాలు కూడా తగ్గుముఖం పడుతున్నాయి. ప్రభుత్వం పన్ను మినహాయింపు ఇవ్వడం ద్వారా ఎక్కువ ఖర్చు చేసేలా ప్రజలను ప్రోత్సహించాలన్నారు.