Aadhaar Card: ఇకపై పుట్టిన తేదీ రుజువుగా ఆధార్ కార్డ్ చెల్లదు.. కేవలం గుర్తింపు కోసమే.. భారీ షాక్ ఇచ్చిన ఈపీఎఫ్‌వో..!

Aadhaar Card: ఎంప్లాయీ ప్రావిడెంట్ ఫండ్ ఆర్గనైజేషన్ (EPFO) ఇకపై పుట్టిన తేదీ రుజువు కోసం ఆధార్ కార్డును చెల్లుబాటు అయ్యే పత్రంగా పరిగణించదు. యునిక్ ఐడెంటిఫికేషన్ అథారిటీ ఆఫ్ ఇండియా (UIDAI) ఆదేశాలను అనుసరించి పుట్టిన తేదీ రుజువు కోసం చెల్లుబాటు అయ్యే పత్రాల జాబితా నుంచి ఆధార్ కార్డును తొలగించాలని EPFO ​​నిర్ణయం తీసుకుంది.

డిసెంబరు 22, 2023న, UIDAI ఒక వ్యక్తి గుర్తింపును ధృవీకరించడానికి ఆధార్ కార్డ్‌ని ఉపయోగించవచ్చని సూచనలను జారీ చేసింది. అయితే, ఇది పుట్టిన తేదీకి రుజువు కాదు. పుట్టిన తేదీకి రుజువుగా ఇవ్వాల్సిన పత్రాల జాబితా నుంచి ఆధార్ కార్డు తొలగించబడిందని UIDAI తెలిపింది.

ఆధార్ కార్డ్ అనేది గుర్తింపు, నివాస రుజువు కోసమే..

UIDAI తన సర్క్యులర్‌లో ఆధార్ ప్రత్యేకమైన 12 అంకెల ID అని పేర్కొంది. ఇది భారత ప్రభుత్వంచే జారీ చేసింది. ఇది మీ గుర్తింపు, శాశ్వత నివాసానికి రుజువుగా దేశవ్యాప్తంగా చెల్లుబాటు అవుతుంది. దానిపై పుట్టిన తేదీ అందించారు. కానీ, దానిని పుట్టిన తేదీ రుజువుగా ఉపయోగించకూడదు అంటూ పేర్కొంది.

పుట్టిన తేదీ రుజువు కోసం చెల్లుబాటు అయ్యే పత్రాలు

జనన మరణాల రిజిస్ట్రార్ జారీ చేసిన జనన ధృవీకరణ పత్రం

గుర్తింపు పొందిన ప్రభుత్వ బోర్డు లేదా విశ్వవిద్యాలయం జారీ చేసిన మార్క్‌షీట్

పేరు, పుట్టిన తేదీని కలిగి ఉన్న స్కూల్ లీవింగ్ సర్టిఫికేట్

కేంద్ర లేదా రాష్ట్ర ప్రభుత్వ సర్వీస్ రికార్డ్ ఆధారంగా సర్టిఫికేట్

ఆదాయపు పన్ను శాఖ జారీ చేసిన పాన్ కార్డ్

ప్రభుత్వం జారీ చేసిన నివాస ధృవీకరణ పత్రం

సివిల్ సర్జన్ జారీ చేసిన మెడికల్ సర్టిఫికేట్.