Public Sector Banks: ముగిసిన 14 ఏళ్ల 'వనవాసం'..ప్రభుత్వ బ్యాంకుల సత్తా – ప్రైవేటు బ్యాంకుల పనైపోయిందా?

Public Sector Banks: 2011 తర్వాత తొలిసారిగా ప్రభుత్వ రంగ బ్యాంకులు రుణాల పంపిణీలో ప్రైవేటు రంగ బ్యాంకులను అధిగమించాయి. 2025 ఆర్థిక సంవత్సరం ముగిసే నాటికి, ప్రభుత్వ బ్యాంకులు ప్రైవేటు బ్యాంకుల కంటే 4% ఎక్కువ రుణ వృద్ధిని నమోదు చేశాయి. ప్రభుత్వ బ్యాంకులు సంవత్సరానికి 13.1% రుణ వృద్ధిని నమోదు చేయగా, ప్రైవేటు బ్యాంకులకు ఇది 9% మాత్రమే. బ్యాంకుల ఈ బలమైన పనితీరు మార్ట్‌గేజ్, కార్పొరేట్ రుణాలు, ఆటో రుణాలు వంటి అనేక విభాగాల్లో కనిపించింది. ఐసీఐసీఐ బ్యాంక్ ప్రస్తుత ప్రైస్-టు-బుక్ నిష్పత్తి సుమారు 3.5 గా ఉంది. భారతీయ స్టేట్ బ్యాంక్ ప్రైస్-టు-బుక్ నిష్పత్తి సుమారు 1.5 గా ఉంది. ఇది రెండు బ్యాంకుల వృద్ధి, లాభదాయకత, రిస్క్ ప్రొఫైల్‌ను చూపుతుంది.

ప్రజలు ప్రైవేటు బ్యాంకులపై ఆసక్తిని తగ్గించుకుని, ప్రభుత్వ బ్యాంకుల వైపు మొగ్గు చూపుతున్నారని స్పష్టంగా కనిపిస్తోంది. ఈటీ నివేదిక ప్రకారం.. ఏప్రిల్ 19న వచ్చిన ఆదాయ వివరాలపై ఐసీఐసీఐ బ్యాంక్ గ్రూప్ సీఎఫ్ఓ అనింద్య బెనర్జీ మాట్లాడుతూ.. "చాలా పెద్ద పోటీదారులు ఉన్నారు. మా కంటే వారి ధరలు (వడ్డీ రేట్లు) చాలా తక్కువగా ఉన్నాయి. ఇది వృద్ధి విషయంలో కొన్ని సవాళ్లను సృష్టిస్తుంది. కానీ ఇది జీవితంలో ఒక భాగం అని నేను భావిస్తున్నాను. కాబట్టి, మనం ముందుకు సాగుతూ దీనిని ఎదుర్కోవాలి. లాభదాయకమైన వృద్ధిని కొనసాగించడానికి ఇతర మార్గాలను ఎలా ఉపయోగించుకోవచ్చో చూడాలి." అని అన్నారు. ఆయన మాటలను బట్టి ప్రభుత్వ బ్యాంకుల నుంచి వస్తున్న పోటీని ఆయన పరోక్షంగా ఒప్పుకున్నట్లు అర్థమవుతుంది.

హెచ్‌డీఎఫ్‌సీ బ్యాంక్ కూడా చాలా త్రైమాసికాలుగా ఇదే సమస్యను ఎదుర్కొంటోంది. హెచ్‌డీఎఫ్‌సీ బ్యాంక్ చీఫ్ ఫైనాన్షియల్ ఆఫీసర్ శ్రీనివాసన్ వైద్యనాథన్ ఏప్రిల్‌లో మాట్లాడుతూ, "గత 12 నెలలు, 18 నెలలుగా మేము చూసింది ఏమిటంటే పెద్ద కార్పొరేట్ రుణాలు, పెద్ద ఎస్‌ఎంఈ రుణాలలో (SME Loans) పోటీ ఉంది. ఎక్కువగా ప్రభుత్వ రంగ సంస్థల నుండి రుణాలు వస్తున్నాయి. అక్కడ వృద్ధి ఒక లక్ష్యం, లాభం లేదా రాబడి ముఖ్యం కాదు. వాటిపై ధరల నిర్ణయం చాలా తక్కువగా ఉందని మేము చూసాము." అని అన్నారు. దీనిని బట్టి ప్రభుత్వ బ్యాంకులు తక్కువ వడ్డీ రేట్లకు రుణాలు అందిస్తున్నాయని, ఇది ప్రైవేటు బ్యాంకులకు సవాలుగా మారిందని స్పష్టమవుతోంది.

ఆర్‌బీఐ (RBI) గణాంకాలు, బర్న్‌స్టైన్ విశ్లేషణల ప్రకారం.. 2011 ప్రారంభంలో ప్రభుత్వ రంగ బ్యాంకులు, ప్రైవేటు బ్యాంకుల రుణ వృద్ధి మధ్య వ్యత్యాసం దాదాపు 4% ఉండేది. ఇది 2016లో 20% గరిష్ట స్థాయికి చేరుకుంది. కోవిడ్ ప్రారంభంతో ఈ వృద్ధి వ్యత్యాసం తగ్గడం ప్రారంభమైంది. మళ్ళీ అది 4% కి పడిపోయింది.

2025 ఆర్థిక సంవత్సరం ముగిసే నాటికి, ప్రభుత్వ బ్యాంకుల వద్ద మొత్తం 98.2 లక్షల కోట్ల రూపాయల లోన్ పోర్ట్‌ఫోలియో ఉంది. దీని మార్కెట్ వాటా 52.3%గా ఉంది. దీనితో పోలిస్తే, ప్రైవేటు రంగ బ్యాంకుల రుణాల మొత్తం 75.2 లక్షల కోట్ల రూపాయలుగా ఉంది, ఇది మొత్తం రుణాల్లో 40% వాటా కలిగి ఉంది. అంతేకాకుండా, 5 ప్రభుత్వ రంగ బ్యాంకులు తమ కార్పొరేట్ రుణాలలో 10% వృద్ధిని నమోదు చేయగా, ప్రైవేటు బ్యాంకులు 4% కన్నా తక్కువ వృద్ధిని చూశాయి. ఈ గణాంకాలు ప్రభుత్వ బ్యాంకుల పునరుజ్జీవనాన్ని స్పష్టం చేస్తున్నాయి.