Infosys: ఎక్కువ గంటలు పని చేయొద్దు.. ఉద్యోగులకు ఇన్ఫోసిస్ షాక్.. అసలేం జరిగింది ?

Infosys: వారానికి 70 గంటలు పని చేయాలి.. అని కొద్ది నెలల క్రితం పెద్ద చర్చకు తెరలేపిన ఇన్ఫోసిస్ సహ-వ్యవస్థాపకుడు నారాయణ మూర్తి ఇప్పుడు షాకింగ్ న్యూస్‌తో వార్తల్లో నిలిచారు. ఆయన చెప్పిన దానికి భిన్నంగా, ఆయన స్థాపించిన ఇన్ఫోసిస్ కంపెనీ ఇప్పుడు తమ ఉద్యోగులకు వర్క్-లైఫ్ బ్యాలెన్స్ పాటించమని గట్టిగా చెబుతోంది. వర్క్ ఫ్రమ్ హోమ్ చేస్తున్నప్పుడు ఎక్కువ గంటలు పని చేయకుండా జాగ్రత్త పడాలని, లేదంటే ఆరోగ్యం దెబ్బతింటుందని హెచ్చరిస్తోంది. ఇన్ఫోసిస్ తమ ఉద్యోగులందరికీ వ్యక్తిగతంగా ఇమెయిల్స్ పంపింది. ఆ ఇమెయిల్స్‌లో, "మీరు రోజూ ఆఫీసులో పని చేసే సమయాన్ని కచ్చితంగా పాటించాలి" అని సూచించింది. అంతేకాదు, ఇప్పుడు కంపెనీ ఒక కొత్త సిస్టమ్‌ను కూడా ప్రవేశపెట్టింది. ఈ సిస్టమ్ ప్రకారం ఎవరైనా 9 గంటల 15 నిమిషాల కంటే ఎక్కువ సమయం పని చేస్తే, అది ఆటోమేటిక్‌గా కంపెనీకి ఒక హెచ్చరిక పంపుతుంది.

ఒక ఉద్యోగి పేరు చెప్పడానికి ఇష్టపడకుండా మాట్లాడుతూ, "ఒకవేళ గత నెల రోజుల్లో మా పని గంటలు సాధారణం కంటే ఎక్కువగా ఉంటే, కంపెనీ మాకు ప్రత్యేకంగా ఇమెయిల్స్ పంపి హెచ్చరిస్తోంది. ఈ ఇమెయిల్స్‌లో ఉద్యోగుల ఆరోగ్యం, అలాగే వారి పని సామర్థ్యానికి వర్క్-లైఫ్ బ్యాలెన్స్ ఎంత ముఖ్యమో వివరిస్తున్నారు" అని ఆ ఉద్యోగి తెలిపాడు. ఈ మధ్య కాలంలో చాలా వార్తల్లో ఒక విషయం ప్రముఖంగా వినిపిస్తోంది. యువ ఉద్యోగులు ఎక్కువ గంటలు పని చేయడం వల్ల గుండెపోటు వంటి తీవ్రమైన ఆరోగ్య సమస్యల బారిన పడుతున్నారని ఆ వార్తలు చెబుతున్నాయి. ఈ ప్రమాదాలను దృష్టిలో పెట్టుకొనే ఇన్ఫోసిస్ ఈ కీలక నిర్ణయం తీసుకుంది. ఉద్యోగుల మానసిక, శారీరక ఆరోగ్యం వారి పనితీరుకు చాలా అవసరమని కంపెనీ నమ్ముతోంది. అందుకే, ఇప్పుడు ఉద్యోగులు ఎక్కువ గంటలు పని చేయకుండా అడ్డుకుంటోంది, అలాగే తమ ఆరోగ్యాన్ని జాగ్రత్తగా చూసుకోమని సలహా ఇస్తోంది.

ఇన్ఫోసిస్ తీసుకున్న ఈ కొత్త నిర్ణయం, దాని వ్యవస్థాపకుడు నారాయణ మూర్తి ఆలోచనకు సరిగ్గా వ్యతిరేకంగా ఉంది. కొన్ని నెలల క్రితం, ఒక పాడ్‌కాస్ట్‌లో నారాయణ మూర్తి మాట్లాడుతూ, మన దేశం అభివృద్ధి చెందాలంటే యువత వారానికి 70 గంటలు పని చేయాలి అని అన్నారు. ఈ మాటలు అప్పట్లో చాలా సంచలనం సృష్టించాయి. దీనిపై పెద్ద ఎత్తున చర్చ జరిగింది. ఆ తర్వాత, మూర్తి తన మాటలకు వివరణ కూడా ఇచ్చారు. తాను 70 గంటలు అని కచ్చితంగా చెప్పలేదని, కష్టపడి, అంకితభావంతో పని చేయడాన్ని నొక్కి చెప్పాలనుకున్నానని అన్నారు. 2024 డిసెంబర్ 15న కోల్‌కతాలో జరిగిన ఇండియన్ ఛాంబర్ ఆఫ్ కామర్స్ కార్యక్రమంలో కూడా ఆయన తన వ్యాఖ్యలను సమర్థించుకున్నారు. భారతదేశాన్ని ప్రపంచంలోనే నంబర్ 1 గా మార్చాలంటే యువత కష్టపడి పని చేయాలని ఆయన అన్నారు. అయితే, ఇప్పుడు ఆయన స్థాపించిన కంపెనీ మాత్రం ఆయన ఆలోచనను పక్కన పెట్టి, ఉద్యోగుల శ్రేయస్సు కోసం ఈ కొత్త విధానాన్ని తీసుకొచ్చింది.

బెంగుళూరు కేంద్రంగా పనిచేసే ఇన్ఫోసిస్ కంపెనీలో ప్రస్తుతం సుమారు 3,23,500 మంది ఉద్యోగులు ఉన్నారు. గతంలో, ఉద్యోగులు నెలకు కనీసం 10 రోజులు ఆఫీసుకు వచ్చి పని చేయాలనే విధానం ఉండేది. కానీ, ఇప్పుడు వర్క్ ఫ్రమ్ హోమ్ పద్ధతి కొనసాగుతున్నప్పటికీ, ఉద్యోగుల పని గంటలపై కంపెనీ కఠినంగా వ్యవహరించాలని నిర్ణయించుకుంది. ఈ చర్య ఉద్యోగుల ఆరోగ్యాన్ని కాపాడటమే కాదు, వారి పని సామర్థ్యాన్ని కూడా పెంచుతుందని ఇన్ఫోసిస్ భావిస్తోంది. పని గంటలను నియంత్రించడం ద్వారా ఉద్యోగులు మరింత ఉత్సాహంగా, ఆరోగ్యంగా పని చేయగలరని కంపెనీ నమ్మకం.