Mini Countryman: 462కిమీల మైలేజీ.. 30 నిమిషాల్లో ఛార్జింగ్.. ఆ ఫీచర్‌తో వచ్చిన తొలి కార్ ఇదే.. ధరెంతంటే?

Mini Countryman: మినీ ఇండియా అధికారికంగా తన కొత్త ఎలక్ట్రిక్ కారు మినీ కంట్రీమ్యాన్‌ని భారత మార్కెట్‌లో అమ్మకానికి విడుదల చేసింది. ఆకర్షణీయమైన లుక్స్, శక్తివంతమైన బ్యాటరీ ప్యాక్‌తో కూడిన ఈ ఎలక్ట్రిక్ కారు ప్రారంభ ధర రూ.54.90 లక్షలు (ఎక్స్-షోరూమ్)గా నిర్ణయించారు. ఎలక్ట్రిక్ వెర్షన్‌తో పాటు, కంట్రీమ్యాన్ గ్లోబల్ మార్కెట్‌లో (ICE) పెట్రోల్ వేరియంట్‌లో కూడా అమ్మకానికి అందుబాటులో ఉంది. అయితే ప్రస్తుతం భారతీయ మార్కెట్లో ఎలక్ట్రిక్ మోడల్ మాత్రమే ప్రారంభించారు.

మినీ కంట్రీమ్యాన్ ఎలక్ట్రిక్ కార్ ఎలా ఉందంటే..

BMW iX1 ఆధారంగా, ఈ ఎలక్ట్రిక్ కారు రూపకల్పన చాలావరకు మునుపటి తరం మోడల్‌ను పోలి ఉంటుంది. కానీ, కంపెనీ సరళంగా చేయడానికి దీని డిజైన్‌ను తగ్గించింది. ఇది మీకు కూపర్ ఎస్‌ని గుర్తు చేస్తుంది. మునుపటి మోడల్‌తో పోలిస్తే, ఈ కారు 60 మిమీ ఎక్కువ, 130 మిమీ పొడవు ఉంటుంది. దీని ఫలితంగా మీరు కారు లోపల ఎక్కువ స్థలాన్ని పొందుతారు.

పనితీరు, డ్రైవింగ్ పరిధి..

మినీ కంట్రీమ్యాన్ ఎలక్ట్రిక్‌లో, BMW iX1 నుంచి తీసుకున్న 66.4kWh సామర్థ్యం గల బ్యాటరీ ప్యాక్‌ను కంపెనీ అందించింది. ఈ కారులో ఒకే మోటారు ఉంది. ఇది ఫ్రంట్-వీల్ డ్రైవింగ్ కాన్ఫిగరేషన్‌తో జత చేశారు. ఈ ఎలక్ట్రిక్ మోటార్ 204hp పవర్, 250Nm టార్క్ ఉత్పత్తి చేస్తుంది. ఈ కారు కేవలం 8.6 సెకన్లలో 0 నుంచి 100 కిమీ/గం వేగాన్ని అందుకోగలదని కంపెనీ పేర్కొంది. దీని గరిష్ట వేగం గంటకు 170 కి.మీలు ఉంటుంది.

ఈ కారు ఒక్కసారి ఛార్జింగ్ చేస్తే 462 కిలోమీటర్లు ప్రయాణించగలదని కంపెనీ తెలిపింది. దీని బ్యాటరీని 130kW ర్యాపిడ్ ఛార్జర్‌తో 30 నిమిషాల్లో 10 శాతం నుంచి 80 శాతం వరకు సులభంగా ఛార్జ్ చేయవచ్చు.

ఫీచర్లు ఎలా ఉన్నాయంటే..

లెవెల్-2 అడ్వాన్స్‌డ్ డ్రైవింగ్ అసిస్టెన్స్ సిస్టమ్ (ADAS) అందుబాటులోకి వచ్చిన మొదటి కారు ఇదే. ఇది సెమీ-అటానమస్ డ్రైవింగ్ సిస్టమ్‌ను కూడా కలిగి ఉంది. ఇది 60 కిమీ/గం వేగంతో ఆటోమేటిక్‌గా డ్రైవ్ చేయడానికి అనుమతిస్తుంది. దీనిలో, చాలా సెట్టింగ్‌లు టచ్‌స్క్రీన్ ద్వారా మాత్రమే నిర్వహించుకోవచ్చు. అందువల్ల ఎక్కువ బటన్‌లు ఉపయోగించలేదు.