Maruti Suzuki Dzire Hybrid: జోరు పెంచుతున్న మారుతి.. ఆ పవర్ ఫుల్ కారును హైబ్రిడ్ వేరియంట్‌లో తీసుకొచ్చింది..!

Maruti Suzuki Dzire Hybrid: భారతదేశంలో అత్యధికంగా అమ్ముడవుతున్న సెడాన్‌‌లలో మారుతి సుజికి డిజైర్ ఒకటి. దీని అమ్మకాలు రికార్డులను క్రియేట్ చేస్తున్నాయి. కంపెనీ ఇప్పుడు డిజైర్‌ను ప్రపంచ స్థాయికి తీసుకెళ్తోంది. సుజుకి తన ప్రసిద్ధ సెడాన్ కారు డిజైర్‌ను ఫిలిప్పీన్స్ మార్కెట్లో 'డిజైర్ హైబ్రిడ్' అనే కొత్త హైబ్రిడ్ అవతార్‌లో విడుదల చేసింది. ఈ హైబ్రిడ్ డిజైర్ PHP 9,20,000 ఫిలిప్పీన్స్ కరెన్సీ (సుమారు రూ. 13.9 లక్షలు) ప్రారంభ ధరతో విడుదలైంది. ఈ కొత్త హైబ్రిడ్ డిజైర్ ఎలా ఉందో చూద్దాం.

ఇటీవల మారుతి సుజుకి తన డిజైర్ కొత్త మూడవ తరం మోడల్‌ను దేశీయ మార్కెట్లో విడుదల చేసింది. ఈ కొత్త సెడాన్ కారులో కంపెనీ కొత్త 'Z' సిరీస్ ఇంజిన్‌తో పాటు అనేక ప్రధాన అప్‌గ్రేడ్లను ఇచ్చింది. గ్లోబల్ NCAP క్రాష్ టెస్ట్‌లో పూర్తి 5-స్టార్ రేటింగ్‌ను పొందిన కంపెనీ మొదటి కారు ఇది. ఈ కారు ప్రామాణికంగా 6 ఎయిర్‌బ్యాగ్‌లతో వస్తుంది. భారత మార్కెట్లో దీని ప్రారంభ ధర రూ. 6.79 లక్షల ఎక్స్-షోరూమ్.

కొత్త డిజైర్ హైబ్రిడ్ గురించి మాట్లాడుకుంటే, ఇందులో హైబ్రిడ్ ఇంజిన్ సీవీటీ గేర్‌బాక్స్‌తో ఉంది. లుక్, డిజైన్ పరంగా, ఇది ప్రస్తుతం భారత మార్కెట్లో అమ్ముడవుతున్న డిజైర్‌ని పోలి ఉంటుంది. సుజుకి భారతదేశంలో అందిస్తున్న డిజైర్‌తో సన్‌రూఫ్‌ను ఫిలిప్పీన్స్‌లో అందించడం లేదు. ఇది కాకుండా హైబ్రిడ్ టెక్నాలజీతో వచ్చే 1.2 లీటర్ సామర్థ్యం గల 3-సిలిండర్ నేచురల్లీ ఆస్పిరేటెడ్ Z12E ఇంజిన్‌ ఉంటుంది.

ఇండియన్-స్పెక్ డిజైర్, ఫిలిప్పీన్స్-స్పెక్ డిజైర్ హైబ్రిడ్ మధ్య అతిపెద్ద తేడా పవర్‌ట్రెయిన్‌లో ఉంది. వాటి పేరు సూచించినట్లుగా, ఇండియన్-స్పెక్ మోడల్స్ స్టాప్-స్టార్ట్ సిస్టమ్ తప్ప మరే ఇతర మార్పు ఉండవు. మరోవైపు, ఫిలిప్పీన్స్‌లో ప్రవేశపెట్టిన డిజైర్ హైబ్రిడ్ 12V SHVS (సుజుకిచే స్మార్ట్ హైబ్రిడ్ వెహికల్) సిస్టమ్ ఉంది. ఇందులో 0.072 కిలోవాట్ చిన్న బ్యాటరీ ప్యాక్‌ ఉంది, ఇది 2.19 kW (2.93 bhp) ఎలక్ట్రిక్ మోటారుకు శక్తిని పంపుతుంది, ఇది టార్క్ అసిస్ట్‌లో సహాయపడుతుంది. మైలేజీని మెరుగుపరుస్తుంది.

ఫిలిప్పీన్స్‌లో ప్రవేశపెట్టిన సుజుకి డిజైర్ మైలేజీకి సంబంధించి కంపెనీ ఎటువంటి అధికారిక ప్రకటన చేయలేదు. అయితే, ఇది రెగ్యులర్ మోడల్ కంటే మెరుగైన మైలేజీని ఇస్తుందని కంపెనీ చెబుతోంది. భారతదేశంలో, మారుతి సుజుకి డిజైర్ మాన్యువల్ వేరియంట్ 24.79 kmpl మైలేజీని ఇస్తుంది, CNG మాన్యువల్ 33.73 km/kg , పెట్రోల్ AMT వేరియంట్ 25.71 kmpl వరకు మైలేజీని ఇస్తుంది.

డిజైర్ హైబ్రిడ్‌లో కంపెనీ 9-అంగుళాల ఫ్రీ-స్టాండింగ్ ఇన్ఫోటైన్‌మెంట్ స్క్రీన్, పుష్-బటన్ స్టార్ట్, కీలెస్ ఎంట్రీ, క్రూయిజ్ కంట్రోల్, ఆటో క్లైమేట్ కంట్రోల్, రియర్ ఏసీ వెంట్, అల్లాయ్ వీల్స్, ఎల్ఈడీ హెడ్‌లైట్లు, ఫాగ్ లైట్లు, ఎల్ఈడీ టెయిల్ లైట్లు, క్రోమ్ బెల్ట్ లైన్ వంటి ఫీచర్లు అందించింది. ఫిలిప్పీన్స్‌లో డిజైర్‌ను GL, GLX అనే రెండు ట్రిమ్ లెవెల్స్‌లో అందిస్తున్నారు.

ఈ సెడాన్‌లో 6 ఎయిర్‌బ్యాగులు, EBD ఫంక్షన్‌తో కూడిన ABS, ఎలక్ట్రానిక్ స్టెబిలిటీ ప్రోగ్రామ్, హిల్ హోల్డ్ కంట్రోల్, బ్రేక్ అసిస్ట్ ఫంక్షన్, పార్కింగ్ సెన్సార్లు, రియర్‌వ్యూ కెమెరా, సీట్‌బెల్ట్ ప్రిటెన్షనర్, ఫోర్స్ లిమిటర్‌తో కూడిన 3-పాయింట్ ELR సీట్‌బెల్ట్‌లు, చైల్డ్‌ప్రూఫ్ రియర్ డోర్ లాక్, ఇమ్మొబిలైజర్, సెక్యూరిటీ అలారం, హై-మౌంట్ స్టాప్ లాంప్ వంటి భద్రతా లక్షణాలు ఉన్నాయి.