Mahindra Scorpio-N : పెద్ద సన్‌రూఫ్, ADAS సేఫ్టీతో సరికొత్తగా మహీంద్రా స్కార్పియో ఎన్

Mahindra Scorpio-N: మహీంద్రా కంపెనీ పాపులర్ ఎస్‌యూవీ స్కార్పియో-ఎన్ త్వరలో కొన్ని పెద్ద మార్పులతో మళ్ళీ లాంచ్ అవ్వొచ్చని తెలుస్తోంది. మహీంద్రా 2022లో కొత్త జనరేషన్ స్కార్పియో-ఎన్‌ని తీసుకొచ్చింది. అది పాత స్కార్పియో మోడల్ కంటే చాలా పెద్దగా, ప్రీమియంగా వచ్చింది. ఇందులో మోడ్రన్ ఫీచర్లు చాలా ఉన్నాయి. రకరకాల ఇంజిన్, గేర్‌బాక్స్ ఆప్షన్లు కూడా దొరుకుతాయి. స్కార్పియో-ఎన్ ఇప్పటికీ దాని పాత లాడర్-ఆన్-ఫ్రేమ్ ఎస్‌యూవీ ఫీచర్లను అలానే ఉంచుకుంది. కానీ ఇప్పుడు ఇది ఇంకా ఎక్కువ ప్రీమియం ఫీలింగ్‌ను ఇస్తుంది.

మీడియా రిపోర్ట్స్ ప్రకారం, మహీంద్రా స్కార్పియో-ఎన్‌లో ఇప్పుడు కొత్త ఫీచర్ సెట్‌ను యాడ్ చేయబోతున్నారట. ఈ అప్‌డేటెడ్ ఫీచర్లన్నీ ఒక సరికొత్త టాప్-స్పెక్ వేరియంట్‌లో ఇవ్వొచ్చు. మహీంద్రా త్వరలో స్కార్పియో-ఎన్‌కు పనోరమిక్ ఎలక్ట్రిక్ సన్‌రూఫ్ ఆప్షన్‌ను ప్రవేశపెట్టనుంది. ప్రస్తుతం స్కార్పియో-ఎన్ హై-స్పెక్ వేరియంట్లలో సింగిల్-ప్యాన్ ఎలక్ట్రిక్ సన్‌రూఫ్ ఉంది. కానీ ఇది కేవలం ప్రారంభం మాత్రమే.

రిపోర్ట్‌లో ఇంకొక విషయం కూడా ఉంది. అదేంటంటే, మహీంద్రా, స్కార్పియో-ఎన్‌లో ఇప్పుడు లెవెల్ 2 అడ్వాన్స్‌డ్ డ్రైవర్ అసిస్టెన్స్ సిస్టమ్ (ADAS) సూట్‌ను కూడా పెట్టొచ్చు. ఇంకా దీని గురించి కన్ఫర్మేషన్ రాలేదు కానీ, ఎక్స్‌యూవీ 700లో ఉన్న అవే ADAS ఫీచర్లను స్కార్పియో-ఎన్‌లో కూడా ఇవ్వొచ్చు. వాటిలో స్మార్ట్ పైలట్ అసిస్ట్, ఫార్వర్డ్ కొలిజన్ వార్నింగ్, ఆటోమేటిక్ ఎమర్జెన్సీ బ్రేకింగ్, లేన్ డిపార్చర్ వార్నింగ్, అడాప్టివ్ క్రూయిజ్ కంట్రోల్, ట్రాఫిక్ సైన్ రికగ్నిషన్, హై బీమ్ అసిస్ట్, లేన్ కీప్ అసిస్ట్ వంటివి ఉంటాయి. ఈ ఫీచర్లు డ్రైవింగ్‌ను చాలా సురక్షితంగా, సులభతరం చేస్తాయి.

పవర్ గురించి మాట్లాడితే, స్కార్పియో-ఎన్ కొత్త టాప్-స్పెక్ ట్రిమ్ పెట్రోల్, డీజిల్ - రెండు ఇంజిన్ ఆప్షన్లతో వస్తుంది. ఇందులో 2.0-లీటర్ ఎమ్‌స్టాలియన్ టర్బోచార్జ్డ్ పెట్రోల్ ఇంజిన్ మరియు 2.2-లీటర్ ఎమ్‌హాక్ డీజిల్ ఇంజిన్ ఉంటాయి.

పెట్రోల్ ఇంజిన్: 200 బీహెచ్‌పీ (bhp) పవర్, 380 ఎన్ఎమ్ (Nm) పీక్ టార్క్ ఇస్తుంది.

డీజిల్ ఇంజిన్: 172 బీహెచ్‌పీ పవర్, 370 ఎన్ఎమ్ టార్క్ (ఆటోమేటిక్ గేర్‌బాక్స్‌లో 400 ఎన్ఎమ్) ఇస్తుంది.

రెండు ఇంజిన్ ఆప్షన్లలో 6-స్పీడ్ మాన్యువల్, 6-స్పీడ్ టార్క్ కన్వర్టర్ ఆటోమేటిక్ గేర్‌బాక్స్ ఆప్షన్లు దొరుకుతాయి. డీజిల్ వేరియంట్లలో 4x4 డ్రైవ్‌ట్రైన్ కూడా ఉంటుంది. ఇందులో లో-రేంజ్ ట్రాన్స్‌ఫర్ కేస్, బ్రేక్ లాకింగ్ డిఫరెన్షియల్, 4XPLOR టెర్రైన్ మోడ్‌లు ఉంటాయి. ఇవి మంచులో, ఇసుకలో, బురదలో లేదా సాధారణ రోడ్డుపై కూడా చాలా బాగా పని చేస్తాయి. డీజిల్ 2WD వేరియంట్లలో డ్రైవ్ మోడ్‌లు (జిప్, జాప్, జూమ్) ఉంటాయి. వీటిలో 'జూమ్' మోడ్ అత్యధిక థ్రాటిల్ రెస్పాన్స్ ఇస్తుంది. అంటే ఎక్కువ పవర్ వస్తుందన్నమాట.