Tata Punch: దేశంలోనే అత్యంత సేఫ్టీ ఎలక్ట్రిక్‌ కార్‌గా టాటా పంచ్.. క్రాష్ టెస్ట్‌లో ఏకంగా 5 స్టార్ రేటింగ్.. ఫీచర్లలో బెస్ట్.. ధరలో మాత్రం చౌకే..

India's Safest Electric Car: టాటా పంచ్ EV భారతదేశంలో అత్యంత సురక్షితమైన ఎలక్ట్రిక్ కారుగా అవతరించింది. భారత్ న్యూ కార్ అసెస్‌మెంట్ ప్రోగ్రామ్ (BNCAP లేదా Bharat NCAP) నుంచి క్రాష్ టెస్ట్‌లలో ఇది 5-స్టార్ సేఫ్టీ రేటింగ్‌ను పొందింది. క్రాష్ టెస్ట్‌లో, కారు పెద్దల భద్రత కోసం 32 పాయింట్లకుగాను 31.46 పాయింట్లు, అలాగే, పిల్లల భద్రత కోసం 49 పాయింట్లకు 45 పాయింట్లు సాధించింది.

విశేషమేమిటంటే, ఈ కారు ఈ ఏడాది జనవరిలో కంపెనీ ప్రారంభించిన 4 మీటర్ల కంటే తక్కువ శ్రేణిలో భారతదేశపు చౌకైన, చిన్న ఎలక్ట్రిక్ SUVగా పేరుగాంచింది. టాటా నెక్సాన్ క్రాష్ టెస్ట్‌లో 5-స్టార్ సేఫ్టీ రేటింగ్‌ను కూడా పొందింది. పెద్దల భద్రత కోసం కారు 32కి 29.86 పాయింట్లు, పిల్లల భద్రత కోసం 49కి 44.54 పాయింట్లు సాధించింది.

తొలిసారిగా ఎలక్ట్రిక్ కార్ల క్రాష్ టెస్ట్‌ నిర్వహించిన భారత్ ఎన్‌సీఏపీ..

భారత్ ఎన్‌సీఏపీ ఇటీవల రెండు కార్లకు క్రాష్ టెస్ట్ నిర్వహించింది. దాని నివేదిక నిన్న అంటే, గురువారం, జూన్ 13న విడుదలైంది. ఒక భారతీయ ఏజెన్సీ ఎలక్ట్రిక్ వాహనాన్ని క్రాష్ టెస్ట్ చేయడం ఇదే తొలిసారి. ఈ కోణంలో, క్రాష్ టెస్ట్‌లో పాల్గొన్న దేశంలోనే తొలి ఎలక్ట్రిక్ కారుగా టాటా పంచ్ నిలిచింది.

అదే సమయంలో, పంచ్ EV అత్యధిక స్కోరింగ్‌ను పొందిన టాటా మొదటి కారుగా కూడా నిలిచింది. ఇది హారియర్, సఫారి కంటే ఎక్కువ స్కోర్‌ను పొందింది. ఇది పెద్దల, పిల్లల రక్షణ వర్గాలలో 5 స్టార్ రేటింగ్‌ను పొందింది. ఇది అన్ని వేరియంట్‌లకు వర్తిస్తుంది.

22 ఆగస్టు 2023న ఢిల్లీలో జరిగిన కార్యక్రమంలో కేంద్ర రోడ్డు రవాణా శాఖ సహాయ మంత్రి నితిన్ గడ్కరీ BNCAPని ప్రారంభించారు. ఆ తర్వాత, సెప్టెంబర్ 18, 2023న, పూణేలోని చకాన్‌లో ఉన్న సెంట్రల్ ఇన్‌స్టిట్యూట్ ఆఫ్ రోడ్ ట్రాన్స్‌పోర్ట్ (CIRT)లో కమాండ్ అండ్ కంట్రోల్ సెంటర్ ప్రారంభించింది.