షాకింగ్: పేలిన ల్యాప్‌టాప్‌.. సాఫ్ట్‌వేర్‌ ఇంజనీర్‌కు తీవ్ర గాయాలు

Laptop Blast: ఓ సాఫ్ట్​వేర్​ ఉద్యోగిని వర్క్ చేస్తుండగా ఒక్కసారిగా ల్యాప్​టాప్​ పేలడంతో తీవ్రగాయాలపాలైంది. ప్రస్తుతం బాధితురాలి పరిస్థితి విషమంగా ఉన్నట్లు తెలుస్తోంది. బి.కోడూరు మండలంలోని మేకవారి పల్లెలో సుమలత (22) అనే టెక్కీ సోమవారం ఉదయం వర్క్‌ ఫ్రం హోమ్‌ చేస్తున్న సమయంలో షార్ట్‌ సర్క్యూట్‌తో ల్యాప్‌టాప్‌లో ఒక్కసారిగా మంటలు చెలరేగాయి. ఈ ఘటనలో సుమలత తీవ్రంగా గాయపడటంతో ఆమెను కుటుంబసభ్యులు చికిత్స నిమిత్తం వెంటనే కడపలోని ఓ ప్రైవేట్‌ హాస్పిటల్‌కు తరలించారు. ప్రమాద సమయంలో ఆమె బెడ్‌పై ఉండటంతో.. బెడ్‌తో పాటు బెడ్‌షీట్‌ అంతా కాలిపోయింది. ఇంట్లో కూడా చాలా వరకు మంటలు వ్యాపించినట్లు అక్కడి పరిస్థితిని బట్టి తెలుస్తుంది. ప్రస్తుతం ఆమె పరిస్థితి విషమంగా ఉందని డాక్టర్లు చెబుతున్నారు.