Chevireddy Arrest: మద్యం కుంభకోణంలో చెవిరెడ్డి భాస్కరరెడ్డి అరెస్టు – రూ.300 కోట్ల లిక్కర్ స్కాం, కీలక మలుపు

వైకాపా హయాంలో చోటుచేసుకున్న వేల కోట్ల రూపాయల మద్యం కుంభకోణం కేసు సంచలనంగా మారింది. తాజాగా ఈ కేసులో చంద్రగిరి మాజీ ఎమ్మెల్యే, వైకాపా నేత చెవిరెడ్డి భాస్కరరెడ్డిని (A-38) ప్రత్యేక దర్యాప్తు బృందం (సిట్) మంగళవారం అరెస్టు చేసింది. మద్యం డిస్టిలరీల నుంచి వసూలైన ముడుపులలో కొంత భాగం గత ఎన్నికల్లో వైకాపా అభ్యర్థులకు చేరవేశారన్న ఆరోపణల నేపథ్యంలో ఆయనపై కేసు నమోదైంది.

చెవిరెడ్డికి ముడుపుల సొమ్ము చేరవేసిన వ్యక్తిగా ఆయన సన్నిహితుడు వెంకటేశ్ నాయుడును (A-34) కూడా సిట్ అరెస్ట్ చేసింది. వీరిద్దరూ శ్రీలంకకు పారిపోతుండగా బెంగళూరు విమానాశ్రయంలో లుక్ అవుట్ నోటీసుల ఆధారంగా ఇమిగ్రేషన్ అధికారులు వారిని అడ్డగించారు. అనంతరం సిట్ బృందం అక్కడికి వెళ్లి వారిని అదుపులోకి తీసుకుంది.

మద్యం డబ్బుతో ఎన్నికల ప్రచారం?

దర్యాప్తులో వెల్లడైన వివరాల ప్రకారం, రాజ్ కేసిరెడ్డి డిస్టిలరీల నుంచి వసూలు చేసిన మద్యం ముడుపులను చెవిరెడ్డికి అప్పగించేవారు. దాదాపు రూ.250-300 కోట్లు ఆయనకు చేరాయని, వీటిని హైదరాబాద్, బెంగళూరులోని పలు కేంద్రాలకు తరలించి అనంతరం ఐదు జిల్లాల్లో వైకాపా అభ్యర్థులకు పంపిణీ చేశారని సిట్ పేర్కొంది.

రూ.8.36 కోట్ల నగదు లారీ ఘటన – నిజం బయటపడింది

2024 ఎన్నికల సమయంలో గరికపాడు చెక్‌పోస్టులో పట్టుబడిన రూ.8.36 కోట్ల నగదు గురించి సిట్ తాజాగా బాంబు పేల్చింది. అది కూడా మద్యం ముడుపుల సొమ్మేనని స్పష్టం చేసింది. వెంకటేశ్ నాయుడు ద్వారా నగదు లారీ ద్వారా గుంటూరుకు తరలించేందుకు ప్రయత్నించారని విచారణలో తేలింది.

అరెస్టులకు కారణమైన కట్టుదిట్టమైన ఆధారాలు

సిట్ విచారణకు అంతరాయం కలిగించేందుకు చెవిరెడ్డి తీవ్రంగా ప్రయత్నించారని అధికారులు పేర్కొన్నారు. తన అనుచరులను ముందుకు తెచ్చి సిట్ అధికారులపై అబద్ధపు ఆరోపణలు చేయించినట్లు ఆరోపణలున్నాయి. చివరకు తన పాత్రను గుర్తించిన సిట్, అదుపులోకి తీసుకునే ప్రయత్నాలు ముమ్మరం చేయడంతో చెవిరెడ్డి దేశం విడిచి వెళ్లేందుకు ప్రణాళిక వేసినట్లు తెలిసింది.

కేసులో నిందితుల లిస్టు ఇలా:

• A-38: చెవిరెడ్డి భాస్కరరెడ్డి – వైకాపా నేత, చంద్రగిరి మాజీ ఎమ్మెల్యే
• A-39: మోహిత్ రెడ్డి – చెవిరెడ్డి కుమారుడు, తుడా మాజీ చైర్మన్
• A-34: వెంకటేశ్ నాయుడు – చెవిరెడ్డి సన్నిహితుడు, మద్యం డబ్బు తరలింపులో కీలకం
• A-35: బాలాజీ యాదవ్ – మోహిత్ అనుచరుడు
• A-36: నవీన్ – చెవిరెడ్డి పీఏ
• A-37: హరీష్ – డ్రైవర్