AP Cabinet Meeting: ఇవాళ ఏపీ కేబినెట్‌ భేటీ

AP Cabinet Meeting: ఏపీ కేబినెట్ నేడు సమావేశం కానుంది. సీఎం జగన్ అధ్యక్షతన మంత్రి వర్గంలో పలు కీలక అంశాలపై చర్చించనున్నారు. రాష్ట్రంలో జరుగుతున్న తాజా పరిణామాలపై చర్చించనున్నారు. పీఆర్సీపై ఉద్యోగులు ఆగ్రహం వ్యక్తం చేస్తుండటంతో ఈ అంశంపైనా చర్చ జరిగే అవకాశం ఉంది. ఏపీ మంత్రులు కూడా ఉద్యోగుల తీరును తప్పుబడుతున్నారు. గతంలో పీఆర్సీకి ఓకే చెప్పి ఇప్పుడు నిరసనలకు దిగడం సరికాదంటున్నారు. ఈ నేపథ్యంలో పీఆర్సీపై కీలక చర్చ జరగనున్నట్లు తెలుస్తోంది.

రాష్ట్రంలో కరోనా కేసుల సంఖ్య 12వేల మార్కు దాటింది. ఈ నేపథ్యంలో పీఆర్సీ, కరోనా అంశాలే ప్రధాన అజెండాగా ఏపీ కేబినెట్ నేడు సమావేశం కానుంది. అలాగే కొన్ని ఆర్డినెన్సులకు ఆమోద ముద్ర వేయనున్నట్లు తెలుస్తోంది. ప్రస్తుతం ఆంధ్రప్రదేశ్‌లో సినిమా టికెట్ల వ్యవహారం హాట్ టాపిక్‌గా మారింది. ఈ నేపథ్యంలో సినిమా టికెట్ల అంశంపై చర్చించే అవకాశం ఉందని సమాచారం. మొత్తంగా కేబినెట్‌ భేటీలో 32 అంశాలపై చర్చ జరగనుంది. రైతులకు విత్తనాలు, ఎరువుల సరఫరాకు ఈ-విక్రయ కార్పొరేషన్‌ ఏర్పాటు, ఇంధనశాఖకు సంబంధించి మరో రెండు అంశాలపై కేబినెట్‌ చర్చించనుంది.