AP DSC Exams Update: ఇవాళ్టి నుంచి ప్రాథమిక కీలు విడుదల – లింక్ ఇదే

AP DSC Exams Update: ఆంధ్రప్రదేశ్ రాష్ట్రంలో డీఎస్సీ-2025 పరీక్షలు శాంతియుతంగా కొనసాగుతున్నాయి. ఇప్పటికే పలు విభాగాల పరీక్షలు ముగిశాయి. తాజాగా, స్కూల్ అసిస్టెంట్ (లాంగ్వేజ్) విభాగంలోని కన్నడ, ఒడియా, తమిళం, ఉర్దూ భాషలకు సంబంధించిన ప్రాథమిక కీలు ఈ రోజు నుంచి (జూన్ 17) విడుదల చేస్తున్నట్లు విద్యాశాఖ ప్రకటించింది.

అభ్యర్థులు ఈ ప్రాథమిక కీలను అధికారిక వెబ్‌సైట్ https://apdsc.apcfss.in ద్వారా డౌన్‌లోడ్ చేసుకోవచ్చు. అలాగే, ఈ కీపై ఉన్న అభ్యంతరాలను జూన్ 23వ తేదీ లోపు ఆధారాలతో పాటు అదే వెబ్‌సైట్ ద్వారా సమర్పించాల్సి ఉంటుంది.

ఇప్పటివరకు నిర్వహించిన పరీక్షల్లో భారీగా హాజరు

డీఎస్సీ కన్వీనర్ కృష్ణారెడ్డి ప్రకారం, సోమవారం జరిగిన స్కూల్ అసిస్టెంట్ (నాన్ లాంగ్వేజ్) – సోషల్ స్టడీస్ పరీక్షకు రాష్ట్రవ్యాప్తంగా 38,243 మంది దరఖాస్తు చేసుకోగా, 36,372 మంది (95.11%) హాజరయ్యారు. ఉదయం అనంతపురం జిల్లాలో 97.84%, మధ్యాహ్నం చిత్తూరు జిల్లాలో 97.98% హాజరు నమోదైంది.

వెబ్‌సైట్‌లో లభ్యమయ్యే వివరాలు

విద్యాశాఖ ప్రకటన ప్రకారం, అభ్యర్థుల లాగిన్‌లో రెస్పాన్స్ షీట్‌లు అందుబాటులో ఉంటాయి. అభ్యర్థులు తమ సమాధానాల వాలిడేషన్ కోసం వాటిని పరిశీలించి, ఎలాంటి పొరపాట్లు ఉన్నా సంబంధిత ఆధారాలతో అభ్యంతరాలు తెలియజేయవచ్చు.

16,347 పోస్టుల భర్తీకి 5.77 లక్షల అప్లికేషన్లు

ఈసారి ఏపీ మెగా డీఎస్సీ ద్వారా 16,347 ఖాళీలను భర్తీ చేయనున్నారు. మొత్తం 5,77,417 దరఖాస్తులు అందాయి. చాలామంది అభ్యర్థులు తమ అర్హతల మేరకు ఒకటి కంటే ఎక్కువ పోస్టులకు దరఖాస్తు చేసుకున్నారు. పరీక్షలన్నీ పూర్తయిన తర్వాత ఏ విభాగానికి ఎంత మంది హాజరయ్యారన్న దానిపై పూర్తి సమాచారం బయటకు రానుంది.

గమనిక: ప్రాథమిక కీపై అభ్యంతరాలను జూన్ 23వ తేదీ లోపు మాత్రమే సమర్పించాలి. అప్పుడు వరకు వెబ్‌సైట్‌లో లింక్ యాక్టివ్‌గా ఉంటుంది.