Hari Hara Veera Mallu: ‘హరిహర వీరమల్లు’ సూపర్‌హిట్ కావాలని ఆకాంక్షిస్తున్నా...సీఎం చంద్రబాబు

Hari Hara Veera Mallu: పవర్‌స్టార్ పవన్ కళ్యాణ్ నటించిన భారీ చారిత్రాత్మక చిత్రం ‘హరిహర వీరమల్లు’ గురువారం (జూలై 24) grand release కానున్న నేపథ్యంలో ఆంధ్రప్రదేశ్ ముఖ్యమంత్రి నారా చంద్రబాబు నాయుడు తన శుభాకాంక్షలు తెలియజేశారు. ఈ మేరకు ఆయన తన అధికారిక ఎక్స్ (ట్విట్టర్) ఖాతా ద్వారా ఒక పోస్ట్‌ చేశారు.

"పవన్ కల్యాణ్ అభిమానులు, ప్రేక్షకులు ఎంతో కాలంగా ఎదురుచూస్తున్న ‘హరిహర వీరమల్లు’ సినిమా విడుదల సందర్భంగా నా శుభాకాంక్షలు. మిత్రుడు పవన్ కథానాయకుడిగా చరిత్రాత్మక నేపథ్యంతో తెరకెక్కిన ఈ చిత్రం సూపర్‌హిట్ కావాలని ఆకాంక్షిస్తున్నాను. డిప్యూటీ సీఎంగా బాధ్యతలు నిర్వహిస్తూనే సమయాన్ని కేటాయించి నటించిన ఈ సినిమా అన్ని వర్గాలను ఆకట్టుకోవాలి." — అంటూ చంద్రబాబు పేర్కొన్నారు.

ఈ సందేశంపై డిప్యూటీ సీఎం పవన్ కళ్యాణ్ హర్షం వ్యక్తం చేశారు. ముఖ్యమంత్రిగా బాధ్యతలు నిర్వహిస్తున్న చంద్రబాబు గారి నుంచి అందిన ఆశయపూరిత సందేశం తనను ఆశ్చర్యానికి, ఆనందానికి లోనచేసిందని ఆయన తెలిపారు.

"గత పదేళ్లలో చంద్రబాబు గారితో ఎన్నోసారి సమావేశమైనా, సినిమాల గురించి ఒక్క మాటా చర్చ జరగలేదు. కానీ ఈ రోజు ‘హరిహర వీరమల్లు’ గురించి ఆయన ఆప్యాయంగా చేసిన వ్యాఖ్యలు నిజంగా ప్రోత్సాహకరంగా ఉన్నాయి. నా బాధ్యతల మధ్యలో ఈ సినిమాకి సమయం కేటాయించడానికి అవకాశం ఇచ్చినందుకూ, చిత్రం విజయాన్ని ఆకాంక్షించినందుకూ చంద్రబాబుగారికి ధన్యవాదాలు." — అని పవన్ కల్యాణ్ స్పందించారు.

ఇంతకుముందే రాష్ట్ర ఐటీ శాఖ మంత్రి నారా లోకేశ్ కూడా ఈ సినిమా విజయం సాధించాలని ట్వీట్ చేశారు. ‘‘పవన్ కళ్యాణ్ గారి స్వాగ్‌ నాకు చాలా ఇష్టం. హరిహర వీరమల్లు కోసం ఎంతో ఆసక్తిగా ఎదురు చూస్తున్నా’’ అని లోకేశ్ పేర్కొన్నారు.

కోహినూర్ డైమండ్ చుట్టూ తిరిగే కథాంశంతో రూపొందిన ఈ చిత్రానికి క్రిష్, జ్యోతికృష్ణలు దర్శకత్వం వహించారు. విడుదలకు ముందే ఓవర్సీస్‌తో పాటు తెలుగు రాష్ట్రాల్లో కొన్ని థియేటర్లలో బుధవారం రాత్రి ప్రీమియర్ షోలు ప్రదర్శించారు. కొన్ని రోజులపాటు టికెట్ ధరలు పెంపునకు రెండు రాష్ట్ర ప్రభుత్వాలూ అనుమతి ఇచ్చినట్లు సమాచారం.