కాఫీ కోసం అంత లోతుకు ఎందుకు.. ప్రక్కన ఉన్న హోటల్ కి వెళ్లితే సరిపోతుందిగా అని ఆలోచిస్తున్నారా.. అంత లోతులో కాఫీ తాగితే వచ్చే మజానే వేరంటున్నారు పర్యటకులు. భూమికి 750 అడుగుల లోతులో.. చుట్టూ గుహలు.. ఓ కమ్మని కాఫీ.. ఆహా భలే రుచిని ఆస్వాదించొచ్చు. బోరు కొడితే షాపింగ్ కూడా చేసేయొచ్చు. ఇంతకీ అదెక్కడ అనుకుంటున్నారా.. అమెరికాలోని న్యూమెక్సికో రాష్ట్రంలో ఓ జాతీయ పార్కుంది. పేరు కాల్స్బేడ్ కేవెర్న్స్ నేషనల్ పార్క్. అక్కడి గ్వాడల్ప్ పర్వతాల్లో.. ఓ కప్పు కాఫీ కోసమే అక్కడికి పర్యటకులు వెళుతుండటం విశేషం.
ఈ పార్కులో బోలెడు గుహలున్నాయి. మొత్తం 118 సున్నపు రాతి గుహలు వరుసగా వందలాది మైళ్లు విస్తరించి ఉన్నాయి. అది కూడా భూమి లోపలికి ఓ సొరంగంలా. ప్రవేశ గుహ ద్వారం నుంచే తారు రోడ్డు ఉంటుంది. దానిపై నడుస్తూ లోపలికెళ్లగానే లోపల కొన్ని గుహ ఛాంబర్లు కనిపిస్తాయి. వాటిని చూసుకుంటూ కాస్త ముందుకెళితే అక్కడో లిఫ్టు ఉంటుంది. ఆ లిఫ్టు పర్యాటకులని భూమి లోతుకి తీసుకెళుతుంది. ఇంతకీ లోతంత తెలిస్తే ఆశ్చర్యపోతారు.. ఒకటి కాదు రెండు ఏకంగా భూమికి 750 అడుగుల లోతుకు తీసుకెళ్లిపోతుంది.
అక్కడే కిలోమీటరున్నరకు పైగా పొడవున్న ఓ పేద్ద గుహ కనిపిస్తుంది. అక్కడ విద్యుత్ బల్బుల వెలుగుల్లో మెరిసిపోతూ ఓ కెఫెటేరియా కనిపిస్తుంది. కమ్మని కాఫీలు, పిజ్జాల్లాంటివి అక్కడ కూర్చుని ఎంచక్కా తినొచ్చు. అక్కడున్న మరో స్టాల్లో షాపింగ్ కూడా చేయచ్చు. అంత లోతులో కాఫీ తాగామనీ పర్యాటకులు గొప్పగా చెప్పుకోవటం మరో విశేషం.