VC Sajjanar: ఫాలోవర్స్ కోసం ఫేక్ ఏఐ వీడియోలు తయారీపై ఆర్టీసీ ఎండీ సజ్జనార్ ఘాటు స్పందన

VC.Sajjanar: సోషల్ మీడియా లోకాన్ని కుదిపేస్తున్న ఫేక్ ఏఐ వీడియోలపై ఆర్టీసీ ఎండీ, ఐపీఎస్ అధికారి సజ్జనార్ తీవ్ర ఆవేదన వ్యక్తం చేశారు. తాజాగా ఎక్స్‌ (ఇటీవలి వరకు ట్విటర్) వేదికగా స్పందించిన ఆయన, AI (ఆర్టిఫిషియల్ ఇంటెలిజెన్స్)ను దుర్వినియోగం చేస్తూ కొన్ని వర్గాలు ప్రచారం కోసం అసత్య వీడియోలు రూపొందిస్తున్నాయని పేర్కొన్నారు.

ప్రస్తుతానికి స్టాండప్ కామెడీ, యాంకర్ రిపోర్టింగ్ లాంటి రంగాల్లో ఇటీవలి కాలంలో ఏఐ ద్వారా రూపొందించిన వల్గర్, తప్పుదారి పట్టించే ఫేక్ వీడియోలు విపరీతంగా వైరల్ అవుతున్నాయి. కొందరు టెక్కీలు అనుచితమైన శైలిలో వీటిని తయారు చేస్తూ సోషల్ మీడియాలో వ్యూస్, ఫాలోవర్స్ కోసం ప్రయత్నిస్తున్నారు. ఈ వీడియోలను నిజంగా నమ్ముతున్నవారూ లేకపోలేదు.

ఈ నేపథ్యంలో సజ్జనార్ ట్వీట్ చేస్తూ..

"సోషల్ మీడియాలో ఫాలోవర్స్, వ్యూస్ కోసం కొందరు ఉద్దేశపూర్వకంగా AIని దుర్వినియోగం చేస్తున్నారు. కుప్పలుగా వస్తున్న ఈ ఫేక్ వీడియోలను చాలా మంది నిజమనే నమ్ముతున్నారు. ఇది చాలా ప్రమాదకరమైన ట్రెండ్. సాంకేతికత రెండు వైపులా పదునైన కత్తిలా ఉంటుంది. దానిని బాధ్యతగా ఉపయోగించకపోతే ప్రమాదకరం. డిజిటల్ యుగంలో AIని అభివృద్ధికి, వ్యక్తిత్వ వికాసానికి వినియోగించాలి. ఈ విధంగా దుర్వినియోగం చేయడం సమాజానికి చేటు." అని హితవు పలికారు.

నెటిజన్లు కూడా ఈ ఫేక్ వీడియోలపై ఆగ్రహం వ్యక్తం చేస్తున్నారు. ప్రభుత్వ యంత్రాంగం ఈ అంశాన్ని తీవ్రమైన సమస్యగా పరిగణించి చర్యలు తీసుకోవాలని కోరుతున్నారు.