Amazon: రూ.400 కోట్లతో పెళ్లి చేసుకుంటున్న అమెజాన్ బాస్.. అటు ఉద్యోగాల కోత.. ఏఐతో భారీ ముప్పు!

Amazon: ఒకవైపు ప్రపంచంలోని అత్యంత ధనవంతుల్లో ఒకరైన అమెజాన్ అధినేత జెఫ్ బెజోస్, తన కాబోయే భార్య లారెన్ సాంచెజ్‌ తో కలిసి రూ.400 కోట్ల ఖర్చుతో భారీ వివాహానికి సిద్ధమవుతుంటే, మరోవైపు ఆయన కంపెనీ అమెజాన్‌లో వేలాది మంది ఉద్యోగులకు ఉద్యోగాలు పోతున్నాయనే వార్తలు కలకలం రేపుతున్నాయి. వెనిస్ అందమైన వీధుల్లో బెజోస్ లగ్జరీ పెళ్లి చేసుకోబోతుంటే, అమెజాన్‌లో ఉద్యోగుల భవిష్యత్తు ప్రశ్నార్థకంగా మారింది.

61 ఏళ్ల జెఫ్ బెజోస్, 55 ఏళ్ల లారెన్ సాంచెజ్ ఈ వారంలో ఇటలీలోని వెనిస్ నగరంలో పెళ్లి చేసుకోనున్నారు. ఇది శతాబ్దపు అత్యంత ఖరీదైన వివాహంగా చెబుతున్నారు. ఈ పెళ్లికి హాలీవుడ్, వ్యాపారం, రాజకీయం, ఆర్థిక ప్రపంచం నుంచి దాదాపు 200-250 మంది ప్రముఖులు హాజరుకానున్నారు. ఇందులో మిక్ జాగర్, ఇవాంకా ట్రంప్, ఓప్రా విన్ఫ్రే, లియోనార్డో డికాప్రియో వంటి పెద్ద పెద్ద పేర్లు కూడా ఉన్నాయి. వెనిస్‌లోని అత్యంత ఖరీదైన హోటల్స్‌లో బెజోస్ స్వంత 500 మిలియన్ డాలర్ల కోరు అనే యాచ్ మీద ఈ పెళ్లి వేడుకలు జరగనున్నాయి.

అమెజాన్ అధినేత పెళ్లి వేడుకల్లో మునిగి తేలుతుంటే, కంపెనీ మాత్రం ఉద్యోగుల తొలగింపు ప్రణాళికలు వేస్తోంది. అమెజాన్ సీఈఓ అండీ జెస్సీ ఇటీవల ఉద్యోగులకు పంపిన ఒక ఇంటర్నల్ మెమోలో, రాబోయే సంవత్సరాల్లో ఆర్టిఫిషియల్ ఇంటెలిజెన్స్ వాడకం పెరగడం వల్ల కార్పొరేట్ ఉద్యోగుల సంఖ్య తగ్గుతుందని చెప్పారు. కొన్ని పనులకు తక్కువ మంది అవసరమవుతారని, కొత్త రకం ఉద్యోగాలకు ఎక్కువ మంది అవసరమవుతారని జెస్సీ స్పష్టం చేశారు. అంటే, AI రాకతో పాత రకం ఉద్యోగాలు కనుమరుగవుతాయని దీని అర్థం.

అమెజాన్ 2022 నుంచి ఇప్పటివరకు 27,000 మందికి పైగా ఉద్యోగులను తొలగించింది. ఇటీవల, 2025 మేలో, అలెక్సా, ఎకో, రింగ్, జూక్స్ రోబోట్యాక్సీలను కలిగి ఉన్న తన డివైసెస్, సర్వీసెస్ యూనిట్ నుండి 100 మంది ఉద్యోగులను తీసివేసింది. ఈ తొలగింపులు కంపెనీని ప్రపంచంలోనే అతిపెద్ద స్టార్టప్‌గా నడపడానికి తమ వ్యూహంలో భాగమని జెస్సీ చెప్పారు. అమెజాన్ ఈ సంవత్సరం AI మౌలిక సదుపాయాల కోసం, ముఖ్యంగా అమెజాన్ వెబ్ సర్వీసెస్ కోసం 105 బిలియన్ డాలర్లు పెట్టుబడి పెడుతోంది.

అమెజాన్ మాత్రమే కాదు, మైక్రోసాఫ్ట్ కూడా తన Xbox విభాగంలో భారీ సంఖ్యలో ఉద్యోగులను తొలగించనున్నట్లు ప్రకటించింది. 2025లో ఇది కంపెనీకి మూడో అతిపెద్ద తొలగింపు. మేలో మైక్రోసాఫ్ట్ 6,000 మంది ఉద్యోగులను తొలగించింది, ఇప్పుడు సేల్స్, Xbox విభాగంలో మరిన్ని వేల మంది ఉద్యోగులను తొలగించడానికి సిద్ధంగా ఉంది. AIలో భారీ పెట్టుబడుల మధ్య ఖర్చులను నియంత్రించడానికి కంపెనీ ఈ చర్యలు తీసుకుంటోందని బ్లూమ్‌బెర్గ్ నివేదిక తెలిపింది.

మైక్రోసాఫ్ట్ ఈ సంవత్సరం AI రంగంలో 80 బిలియన్ డాలర్ల పెట్టుబడిని ప్రకటించింది. కంపెనీ చైర్మన్, సీఈఓ సత్య నాదెళ్ల ఇటీవల భారతదేశంలో 3 బిలియన్ డాలర్ల పెట్టుబడి గురించి ప్రకటించారు. ఇందులో AI డేటా సెంటర్‌లు, క్లౌడ్ కంప్యూటింగ్ ఉన్నాయి. కానీ, ఈ AI విప్లవం వెనుక ఉద్యోగుల భవిష్యత్తు ప్రమాదంలో పడుతోంది. మైక్రోసాఫ్ట్ 2023లో 10,000 మంది ఉద్యోగులను తొలగించింది. ఇప్పుడు 2025లో దాదాపు 6,000 మంది ఉద్యోగులను తొలగించింది. మైక్రోసాఫ్ట్ 2023లో 69 బిలియన్ డాలర్లకు యాక్టివిజన్ బ్లిజార్డ్‌ను కొనుగోలు చేసిన తర్వాత Xbox విభాగంపై ఒత్తిడి మరింత పెరిగింది. ఇప్పుడు కంపెనీ లాభాల మార్జిన్‌లను పెంచడానికి ప్రయత్నిస్తోంది.