Rajat Patidar: 'దోసా, ఇడ్లీ, సాంబార్, చట్నీ..' ఆర్సీబీ ప్లేయర్‌ను గ్రౌండ్‌లోనే ట్రోల్ చేసిన చెన్నై!

Rajat Patidar: ఐపీఎల్ 2025లో చెపాక్ స్టేడియంలో జరిగిన చెన్నై సూపర్ కింగ్స్, రాయల్ చాలెంజర్స్ బెంగళూరు మధ్య జరిగిన హైఓల్టేజ్ మ్యాచ్‌లో ఒక ఆసక్తికర దృశ్యం క్రీడాభిమానులను ఆకట్టుకుంది. రాయల్ చాలెంజర్స్ తరఫున తొలి ఇన్నింగ్స్ ఆడిన వికెట్ కీపర్ జితేశ్ శర్మ క్రీజ్ నుంచి వెనుదిరిగే సమయంలో స్టేడియం డీజే 'దోసా, ఇడ్లీ, సాంబార్, చట్నీ' అనే పాటను ప్లే చేయడం సోషల్ మీడియాలో వైరల్ అయింది.

జితేశ్ మ్యాచ్‌లో ఆరో స్థానంలో 16వ ఓవర్లో క్రీజులోకి వచ్చాడు. తొలి బంతిని వదిలిన వెంటనే రెండో బంతికి సిక్సర్ కొట్టాడు. 17వ ఓవర్ చివరికి పథిరానా వేసిన బంతిని బౌండరీకి తరలించాడు. కానీ, తన పేలుడుతో నిండిన ఆరంభాన్ని కొనసాగించలేకపోయాడు. తర్వాతి ఓవర్‌లో ఖలీల్ అహ్మద్ వేసిన స్లో బంతిని మిస్ అయి అవుట్ అయ్యాడు. మొత్తంగా 6 బంతుల్లో 12 పరుగులు చేశాడు.

అతను పెవిలియన్‌కు నడుచుకుంటూ వెళ్తుండగా స్టేడియంలో వినిపించిన ఆ పాట, ప్రేక్షకుల హర్షధ్వనికి కారణమైంది. అయితే ఈ పాట వినిపించడానికి కారణం ఒక్కదానితో ఆగలేదు. మ్యాచ్‌కు ముందు జితేశ్ శర్మ మీడియా సమావేశంలో చెన్నై అభిమానుల గురించి మాట్లాడే సందర్భంలో దక్షిణాది భాష యాసను అనుకరిస్తూ అదే పాటను పాడిన వీడియో వైరల్ అయ్యింది.

ఆ వీడియోపై సామాజిక మాధ్యమాల్లో విపరీతమైన వ్యతిరేకత వ్యక్తమైంది. చాలామంది అభిమానులు జితేశ్ వ్యాఖ్యలు దక్షిణాది ప్రజలతో చేయబడ్డ అవమానంగా భావించారు. అంతేగాక, ఒక ప్రాంతీయ యాసను సరదాగా తీసుకోవడం అవసరం లేదని కొందరు స్పష్టం చేశారు. ఇక చెన్నై, ఆర్సీబీ మ్యాచ్‌ పూర్తిగా వన్‌ సైడ్‌గా సాగింది. ఆర్సీబీ 50 రన్స్‌ తేడాతో చెన్నైను మట్టికరిపించింది. 17ఏళ్ల తర్వాత చెపాక్‌ స్టేడియంలో బెంగళూరు గెలిచింది.