IPL Updated Schedule: మే 17 నుంచి 17 ఐపీఎల్ మ్యాచులు.. కొత్త షెడ్యూల్ ఇదే

IPL Updated Schedule: ఐపీఎల్ ను ఈ నెల 17న పునరుద్ధరించాలని బీసీసీఐ నిర్ణయం తీసుకుంది. సవరించిన షెడ్యూల్ ప్రకారం టోర్నీ ఫైనల్ జూన్ 3న జరగనుంది. భారత్, పాక్ మధ్య ఉద్రిక్తతల కారణంగా ఈనెల 8న ఐపీఎల్ నిలిచిపోయన విషయం తెలిసిందే. ఐపీఎల్ తిరిగి ఆరంభమయ్యాక తొలి మ్యాచ్ ఈ నెల 17న ఆర్సీబీ, కోల్ కతా మధ్య బెంగళూరులో జరుగుతుంది. బెంగళూరు, జైపూర్, ఢిల్లీ, లఖ్ నవూ, అహ్మదాబాద్, ముంబైలో మిగిలిన లీగ్ మ్యాచులు జరుగుతాయి. ప్లేఆఫ్స్ మ్యాచ్ ల వేదికల వివరాలను తర్వాత ప్రకటించనున్నారు. ఆగిపోయిన పంజాబ్, ఢిల్లీ మ్యాచ్ సహా టోర్నీలో ఇంకా 17 మ్యాచులు ఆడాల్సి ఉంది. హైదరాబాద్ లో జరగాల్సిన రెండు మ్యాచులను కూడా తరలించారు.

ప్రభుత్వం, భద్రతా సంస్థలు అన్ని కీలక వాటాదారులతో విస్తృతమైన సంప్రదింపుల తర్వాత, బోర్డు మిగిలిన సీజన్‌ను కొనసాగించాలని నిర్ణయించింది అని బీసీసీఐ పేర్కొంది. 6 వేదికలలో మొత్తం 17 మ్యాచ్‌లు జరుగుతాయి. ఇవి మే 17, 2025న ప్రారంభమై జూన్ 3, 2025న ఫైనల్‌తో ముగుస్తాయి. సవరించిన షెడ్యూల్‌లో రెండు డబుల్-హెడర్‌లు ఉన్నాయి. ఇవి రెండు ఆదివారాల్లో జరుగుతాయి. ప్లేఆఫ్ మ్యాచ్‌లు మే 29న జరుగుతాయి. క్వాలిఫైయర్ వన్, మే 30న ఎలిమినేటర్, జూన్ 1న క్వాలిఫైయర్ టూ, జూన్ 3న ఫైనల్ జరుగుతుంది.

ప్లేఆఫ్ మ్యాచ్‌ల వేదిక వివరాలను తరువాత ప్రకటిస్తామని బీసీసీఐ తన ప్రకటనలో తెలిపింది. లీగ్ విజయవంతంగా పూర్తి కావడానికి జాతీయ ప్రయోజనాలకు తన నిబద్ధతను బోర్డు పునరుద్ఘాటిస్తుంది.