Shubman Gill: ఓవల్‌ పిచ్‌ వివాదం.. గంభీర్‌, క్యూరేటర్‌ గొడవపై శుభ్‌మన్ గిల్ షాకింగ్ కామెంట్స్!

Shubman Gill: భారత్, ఇంగ్లాండ్ మధ్య లండన్‌లోని ది ఓవల్ మైదానంలో గురువారం నుండి ప్రారంభం కానున్న ఐదో టెస్ట్ మ్యాచ్‌కి ముందు పిచ్ వివాదం పెద్దదైంది. భారత జట్టు హెడ్ కోచ్ గౌతమ్ గంభీర్, ఓవల్ హెడ్ క్యూరేటర్ లీ ఫోర్టిస్ మధ్య జూలై 29న జరిగిన తీవ్ర వాగ్వాదం తర్వాత, ఇప్పుడు భారత యువ బ్యాట్స్‌మెన్ శుభ్‌మన్ గిల్ ఈ విషయంపై గట్టి సమాధానం ఇచ్చారు. క్యూరేటర్ భారత జట్టు సపోర్ట్ స్టాఫ్‌ను పిచ్‌కు 2.5 మీటర్ల దూరం ఉండాలని కోరడంతో ఈ వివాదం మొదలైంది. దీనిపై గంభీర్ తీవ్ర అభ్యంతరం వ్యక్తం చేశారు.

ఐదో టెస్ట్ మ్యాచ్‌కు ముందు జరిగిన ప్రెస్ కాన్ఫరెన్స్‌లో శుభ్‌మన్ గిల్ ఈ వివాదంపై స్పందించారు. భారత జట్టుకు ఇంతకు ముందు ఎప్పుడూ పిచ్‌కు 2.5 మీటర్ల దూరం ఉండాలని ఎవరూ చెప్పలేదని ఆయన అన్నారు. గిల్ ప్రశ్నిస్తూ, "నిన్న ఎందుకు అంత గొడవ జరిగిందో నాకు అర్థం కావడం లేదు. మేము చాలా కాలంగా క్రికెట్ ఆడుతున్నాం. మేము రబ్బర్ స్పైక్స్‌తో లేదా చెప్పులు లేకుండా కూడా పిచ్‌ను పరిశీలించవచ్చు. క్యూరేటర్ మమ్మల్ని అలా చేయకుండా ఎందుకు ఆపాడో నాకు అర్థం కాలేదు" అని అన్నారు. శుభ్‌మన్ గిల్ ఈ వ్యాఖ్యలు క్యూరేటర్ వైఖరిపై అనేక ప్రశ్నలను లేవనెత్తాయి.

ఈ వివాదం మరింత తీవ్రమైంది. ఎందుకంటే, సోషల్ మీడియాలో ఇంగ్లాండ్ ఆటగాళ్లు పిచ్‌పై షాడో ప్రాక్టీస్ చేస్తున్న ఫోటోలు వైరల్ అయ్యాయి. భారత జట్టును పిచ్ దగ్గరకు వెళ్లనివ్వకుండా అడ్డుకుంటే, అటు ఇంగ్లాండ్ జట్టు ఆటగాళ్లను పిచ్‌పై ప్రాక్టీస్ చేస్తూ కనిపించారు. మరోవైపు, ఇంగ్లాండ్ హెడ్ కోచ్ బ్రెండన్ మెకల్లమ్ కూడా పిచ్‌ను చాలా దగ్గరగా పరిశీలిస్తూ కనిపించారు. బ్రెండన్ మెకల్లమ్‌ను పిచ్ దగ్గరకు వెళ్లనివ్వకుండా ఎవరూ ఆపలేదు. ఇది పిచ్ నిబంధనలపై, క్యూరేటర్ వైఖరిపై మరింత అనుమానాలను పెంచింది.

ది ఓవల్ పిచ్ ఎప్పుడూ కూడా పేస్ బౌలర్లకు అనుకూలంగా ఉంటుంది. ఇక్కడ బౌన్స్ చాలా బాగా వస్తుంది. ఈసారి కూడా టీమిండియాకు అలాంటి పిచ్‌నే ఎదురయ్యే అవకాశం ఉంది. ఇంగ్లాండ్ ఈ మ్యాచ్ కోసం ఒక గ్రీన్ పిచ్ ను సిద్ధం చేసింది. దీని కారణంగానే ఇంగ్లాండ్ తమ ప్లేయింగ్ 11లో ఏ ఒక్క స్పిన్నర్‌ను కూడా తీసుకోలేదు. క్రిస్ వోక్స్, గస్ అట్కిన్సన్, జేమీ ఓవర్‌టన్, జోష్ టంగ్ వంటి పేస్ బౌలర్లు ఈ మ్యాచ్ ఆడనున్నారు. ఇలాంటి పిచ్‌పై టీమిండియాకు ఈ మ్యాచ్ గెలవడం అంత సులభం కాకపోవచ్చు.