IPL 2025: ఐపీఎల్ లో సెన్సేషనల్ రికార్డ్ 600సిక్సర్లు బాదిన స్టార్ ప్లేయర్

IPL 2025: నికోలస్ పూరన్ విధ్వంసకర బ్యాటింగ్‌కు పెట్టింది పేరు. ఈ వెస్టిండీస్ ఆటగాడు ఢిల్లీ క్యాపిటల్స్‌పై చెలరేగిపోయి టీ20 క్రికెట్‌లో అరుదైన ఘనతను సాధించాడు. లక్నో సూపర్ జెయింట్స్ వికెట్ కీపర్-బ్యాట్స్‌మెన్ నికోలస్ పూరన్ సోమవారం టీ20 క్రికెట్‌లో 600 లేదా అంతకంటే ఎక్కువ సిక్సర్లు కొట్టిన ప్రపంచంలోనే నాల్గవ బ్యాట్స్‌మెన్‌గా నిలిచాడు.

విశాఖపట్నంలోని డాక్టర్ వైఎస్ రాజశేఖర రెడ్డి స్టేడియంలో ఢిల్లీ క్యాపిటల్స్‌తో జరిగిన మ్యాచ్‌లో పూరన్ ఈ ఘనతను సాధించాడు. ఈ మైలురాయిని చేరుకోవడానికి పురాన్‌కు ఒక సిక్స్ అవసరం కాగా, ఏడో ఓవర్ మూడో బంతికి విప్రజ్ నిగమ్ వేసిన బంతిని లాంగ్ సిక్స్ కొట్టడం ద్వారా అతను ఈ ఘనతను సాధించాడు. దీంతో పురాన్ గేల్, కీరాన్ పొలార్డ్, రస్సెల్ క్లబ్‌లోకి ప్రవేశించాడు. క్రిస్ గేల్ 463 మ్యాచ్‌ల్లో 1056 సిక్సర్లు బాదగా, కీరన్ పొలార్డ్ 695 మ్యాచ్‌ల్లో 908 సిక్సర్లు బాదాడు. రస్సెల్ 539 మ్యాచ్‌ల్లో 733 సిక్సర్లు బాదాడు. 385వ మ్యాచ్‌లో పురాన్ 600 సిక్సర్లు పూర్తి చేశాడు. భారత ఆటగాళ్లలో రోహిత్ శర్మ ముందంజలో ఉన్నాడు. అతను 449 మ్యాచ్‌ల్లో 525 సిక్సర్లు కొట్టాడు.

పూరన్ 3వ స్థానంలో బ్యాటింగ్‌కు వచ్చి చెలరేగిపోయాడు. విప్రజ్ నిగమ్ ఓవర్లో 3 సిక్సర్లు, ట్రిస్టన్ స్టబ్స్ ఓవర్లో వరుసగా 4 సిక్సర్లు కొట్టాడు. పూరన్ తన ఇన్నింగ్స్‌లో 7 సిక్సర్లు, 6 ఫోర్లు కొట్టాడు. అతని స్ట్రైక్ రేట్ 250గా ఉంది. పేసర్లపై 12 బంతుల్లో 15 పరుగులు, స్పిన్నర్లపై 18 బంతుల్లో 60 పరుగులు చేశాడు. మార్ష్‌తో కలిసి 42 బంతుల్లో 87 పరుగుల పార్టనర్ షిప్ నెలకొల్పాడు. దీని వల్లనే లక్నో జట్టు మంచి స్కోరును చేరుకోగలిగింది.