Tom Latham: న్యూజిలాండ్ జట్టుకు భారీ ఎదురుదెబ్బ.. చేయి విరగొట్టుకున్న కెప్టెన్ టామ్ లాథమ్

Tom Latham: ఐపీఎల్ 2025 సీజన్ అద్భుతంగా ప్రారంభమైంది. ఇప్పటివరకు కేవలం 6 మ్యాచ్‌లు మాత్రమే జరిగాయి, కానీ క్రికెట్ ప్రపంచం మొత్తం దాని గురించే మాట్లాడుతోంది. ప్రపంచంలోని అతిపెద్ద లీగ్‌లో జరుగుతున్న యాక్షన్‌పై అందరి దృష్టి ఉంది. అయితే, ఐపీఎల్‌తో పాటు న్యూజిలాండ్‌లో అంతర్జాతీయ క్రికెట్ కూడా ఆడుతున్నారు. అక్కడ ఆతిథ్య జట్టు పాకిస్తాన్‌తో తలపడుతోంది. రెండు జట్ల మధ్య టీ20 సిరీస్ ముగిసిన తర్వాత ఇప్పుడు వన్డే సిరీస్ ఆడాల్సి ఉంది, కానీ అంతకుముందు ఒక లెజెండరీ ఆటగాడు తీవ్రంగా గాయపడ్డాడు. సిరీస్ ప్రారంభానికి ముందే న్యూజిలాండ్ కెప్టెన్ టామ్ లాథమ్ చేయి విరిగింది. దీని కారణంగా తను మొత్తం సిరీస్‌కు దూరమయ్యాడు.

న్యూజిలాండ్, పాకిస్తాన్ మధ్య శనివారం, మార్చి 29 నుంచి మూడు వన్డే మ్యాచ్‌ల సిరీస్ ప్రారంభమవుతుంది. ఈ సిరీస్‌కు ముందు కివీస్ జట్టుకు ఈ చేదు వార్త అందింది. గురువారం, మార్చి 27న న్యూజిలాండ్ క్రికెట్ ఈ సమాచారాన్ని అందించింది. సిరీస్‌కు సన్నాహకంగా ప్రాక్టీస్ చేస్తున్న సమయంలో కెప్టెన్ లాథమ్‌కు చేయికి గాయమైందని జట్టు విడుదల చేసిన పత్రికా ప్రకటనలో పేర్కొంది. అతని చేతికి ఎక్స్-రే తీయగా ఫ్రాక్చర్ అయినట్లు తేలింది. దీని కారణంగా అతను రాబోయే చాలా రోజులు క్రికెట్ కు దూరం కానున్నాడు.

ప్రస్తుతం ఐపీఎల్‌లో బిజీగా ఉన్న మిచెల్ సాంట్నర్ స్థానంలో లాథమ్‌కు జట్టు పగ్గాలు అప్పగించారు. లాథమ్ ఇటీవల న్యూజిలాండ్ ఛాంపియన్స్ ట్రోఫీ జట్టులో సభ్యుడు, అక్కడ టైటిల్ మ్యాచ్‌లో టీమ్ ఇండియా చేతిలో ఓడిపోయింది. ఆ ఫైనల్ తర్వాత లాథమ్ ఆడే మొదటి మ్యాచ్ ఇదే. అయితే, అతని పునరాగమనానికి మరికొన్ని రోజులు పట్టవచ్చు. లాథమ్ లేని సమయంలో ఆల్ రౌండర్ మైఖేల్ బ్రేస్‌వెల్ న్యూజిలాండ్ జట్టుకు కెప్టెన్‌గా వ్యవహరిస్తాడు. బ్రేస్‌వెల్ కెప్టెన్సీలోనే బుధవారం, మార్చి 26న పాకిస్థాన్‌తో జరిగిన చివరి టీ20 మ్యాచ్‌లో న్యూజిలాండ్ 8 వికెట్ల తేడాతో విజయం సాధించింది. దీనితో న్యూజిలాండ్ ఈ సిరీస్‌ను 4-1తో కైవసం చేసుకుంది.

లాథమ్ స్థానంలో హెన్రీ నికోల్స్ కివీస్ జట్టులోకి తిరిగి వచ్చాడు. లాథమ్ లేని సమయంలో మిచ్ హే వికెట్ కీపింగ్ బాధ్యతలు నిర్వర్తిస్తాడు. మిచ్ హే ఇటీవల టీ20 సిరీస్‌లో కూడా భాగమయ్యాడు. అయితే లాథమ్ మాత్రమే కాదు, ఈ సిరీస్‌లోని చివరి రెండు మ్యాచ్‌లకు న్యూజిలాండ్ బ్యాట్స్‌మెన్ విల్ యంగ్ కూడా దూరమయ్యాడు. మంచి ఫామ్‌లో ఉన్న యంగ్ తన మొదటి బిడ్డ జననం కోసం సెలవు తీసుకున్నాడు. అతను ఈ సమయాన్ని తన భార్యతో గడుపుతాడు. దీని కారణంగా సిరీస్‌లోని రెండవ, మూడవ మ్యాచ్‌లకు దూరంగా ఉంటాడు. అతడి ప్లేసులో రీస్ మారియూ మొదటిసారిగా కివీస్ జట్టు నుంచి పిలుపు అందుకున్నాడు.